Ministru ba Asuntus Kombatentes Libertasaun Nasionál, Júlio Sarmento da Costa "Meta Mali". Imajen/Egas Cristovão

DILI, 20 agostu 2020 (TATOLI)-Ministériu ba Asuntu Kombatente Libertasaun Nasionál (MACLN) aprezenta ka haruka ona lista naran veteranu falsu hamutuk ema na’in 500-resin ba Ministériu Públiku (MP) hodi bele prosesa tuir lei ne’ebé  vigora.

Notísia Relevante : PR Lú Olo husu CCLN identifika no buka solusaun ba veteranu falsu

Ministru MACLN, Julio Sarmento da Costa “Meta Mali”, informa, lista veteranu no martir falsu ne’e deskonfia iha indísiu benefisiáriu sira halo falsifikasaun ba dokumentu hodi sai veteranu no martir hodi hetan pensaun husi Estadu.

“Husi lista naran sira-ne’e ami simu keixa mai husi veteranu no komunidade balun  dezde tinan 2012 to’o mai agora   hamutuk ema na’in-500-resin ne’ebé ami haruka ona ba Ministériu Públiku (MP) hodi bele prosesu tuir lei,” Ministru Julio Sarmento da Costa “Meta Mali” hateten hodi responde  Agência Tatoli, ohin, iha ámbitu komemorasaun loron FALINTIL ba dala-45 iha Kuartél Jenerál Fatuhada, Dili.

Nia hateten, kona-ba prosesu sira ne’ebé haruka ba MP hira mak aprezenta ona ba Tribunál  no iha ona desizaun sira nia parte ladún hatene tanba la’ós konpeténsia MACLN maibé MACLN so haruka de’it lista naran.

Ministru Julio Sarmento sei orienta hodi kontinua identifika lista veteranu no martir ne’ebé sidadaun balun  hakarak halo falsifikasaun  hodi hetan ona pensaun  husi Estadu, nune’e bele deteta loloos hodi submete ba lei.

Governu rasik simu ona lista husi Konsellu Veteranu rejista númeru veteranu iha Timor-Leste iha primeira etapa hamutuk na’in-75.000 no rejistu daruak hamutuk na’in-124.600 iha territóriu Timor-Leste.

Governante ne’e esplika, husi númeru ne’e foin verifika na’in-14.000 tanba kestaun orsamentu foin lalais sumba ne’ebé labele kontinua hodi hein OJE 2021 aprova mak bele hahú fila-fali  verifikasaun.

Dadus husi Ministériu ba Asuntu Kombatente Libertasaun Nasionál hatudu katak daudaun ne’e rejista benefisiáriu pensaun (osan) veteranu no martir hamutuk  27.000.

Jornalista   : Nelson de Sousa

Editór        : Francisco Simões

3 KOMENTÁRIU

  1. Husu ba Nai Ulun sira atu Keta halimar ho ema nb falsifika no suporta falsifika documentus ba ema sai veterano falsu hodi procesa tuir Lei nb vigora iha Ita Nia doben Timor Leste, obrigado

  2. Hau senti facil los atu detecta Veteranus falso sira,tamba durante funu nee,Veteranos sira konese malu hela se mk vateranos los i se mak laos veteranos.

  3. hela iha maliana no nunka mai aileu depois hatene fali semaka veteranus iha aileu nemos lalos ida so ema rai nain lokal maka bele detekta ema ne’e luta duni ka la’e ne’e hanesan ijemplu kik ida,timor nee ema hotu terus no iha direitu hanesan atu reklama sira nia direito,karik direito ne’e hakerek ona iha lei.

HAKEREK NO HATÁN

Please enter your comment!
Please enter your name here