Membru PN, José Agostinho Sequeira “Somotxo”. Imajen/Dok.Tatoli

DILI, 02 outubru 2020 (TATOLI)-Membru Parlamentu Nasionál nu’udar mós veteranu kombatente libertasaun nasionál, José Agostinho Sequeira ‘Somotxo’, husu ba Ministériu ba Asuntu Kombatente Libertasaun Nasionál (MACLN) atu kontinua verifika dokumentu veteranu sira nian hodi identifika ema sira ne’ebé halo falsifikasaun ba dokumentu hodi hetan pensaun no direitu veteranu nian.

Notísia Relevante : MACLN identifika tan dokumentu veteranu falsu 3000-resin

“Problema falsifikasaun dokumentu sai veteranu hodi hetan pensaun hahú iha 2008 to’o mai agora komesa sa’e ho númeru boot purvolta 3000-resin, tanba ne’e kontinua husu ba ministériu tutela atu kontinua verifika hodi identifika loloos hodi prosesu tuir dalan justisa,” hateten membru Bankada  FRETILIN, José Sequeira ‘Somotxo’, ba Agência Tatoli, ohin, iha Parlamentu Nasionál.

Nia hateten, iha situasaun falsifikasaun ne’e bele mai hosi ema individual ka koletivu mak fasilita no nia konsidera problema ne’e grave, tanba aktu ida viola lei.

“Ema ne’ebé falsifika sai benefisiáriu hodi hetan benefísiu ikus mai la loos sei iha kriminaliza aktu ida ne’e,” hateten José Sequeira “Somotxo”.

Tuir dadus hosi Ministériu ba Asuntu Kombatente Libertasaun Nasionál nian, iha lista naran falsifikasaun ema na’in 500-resin mak parte inspektór ministériu nian finaliza nia investigasaun hodi haruka ba Ministériu Públiku (MP) hodi prosesa tuir dalan legal.

Iha mós lista seluk ema 3000-resin ne’ebé daudaun parte Ministériu Asuntu Kombatente Libertasaun Nasionál kontinua hala’o prosesu investigasaun, no naran sira ne’e ministériu simu keixa hosi veteranu no komunidade balun hahú hosi  2012 to’o mai agora.

“Sira ne’ebé komesa identifika ona, sei entrega ba iha kompeténsia Ministériu Públiku no ba iha Tribunál,” hateten Deputadu Somotxo.

Tuir dadus hosi Ministériu ba Asuntu Kombatente Libertasaun Nasionál daudaun ne’e rejista benefisiáriu pensaun (osan) veteranu no martir hamutuk 27.000.

Notísia Relevante : Lista veteranu falsu na’in-500-resin ba ona Ministériu Públiku

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here