Uma Tradisionál (Casa típica) hosi Munisípiu Lautém kuaze koñesidu iha mundu ne’ebé reprezenta Timor-Leste no sai símbolu ba Timor-Leste nian. Imajen/Espesiál.

DILI, 04 outubru 2020 (TATOLI)–Brigadeiru Jenerál, Falintil-Forsa Defeza Timor-Leste (F-FDTL), João Miranda “Aluc Descartes”, afirma Uma Tradisionál (Casa típica) hosi Munisípiu Lautém kuaze koñesidu iha mundu ne’ebé reprezenta Timor-Leste maske Governu seidauk iha polítika atu dignifika ida-ne’ebé mak atu sai símbolu ba Timor-Leste nian.

Notísia Relevante: Lautém-oan akumula forsa re-konstrui uma tradisionál Le’e-Iaval

“Uma tradisional hanesan ema hotu nia preokupasaun maibé to’o agora seidauk iha polítika atu dignifika ida-ne’ebé maka atu sai simbolu ba Timor-Leste nian. Maibé, iha fatin hotu, uma tradisional Lautém kuaze koñesidu mundialmente ne’ebé reprezenta nasaun Timor-Leste,” dehan João Miranda liuhosi nia intervensaun iha ambitu reuniaun alargada ne’ebé efetua iha salaun Eskola Cristal, Balide, Dili, foin lalais.

Tuir João Miranda, Munisípiu Lautém kompostu hosi Postu Administrativu lima makPostu Administrativu Lospalos, Lautém, Iliomar, Tutuala no Luro ne’ebé mai ho nia uma tradisionál ne’ebé diferensa maibé uma tradisionál ida-ne’e reprezenta ona Munisípiu Lautém.

“Munisipiu Lautém kompostu hosi Postu Administrativu lima ho ninia uma tradisional ketak maibé ita labele haluha katak nu’udar Lautém-oan, uma tradisionál ida-ne’e maka reprezenta ita tomak,” nia dehan.

Brigadeiru Jenerál husu ba Lautém-oan tomak atu organiza malu hodi hola desizaun ida atu renova fali uma tradisionál ne’ebé ho kondisaun grave daudauk.

“Realmente uma iha ne’eba ho kondisaun grave liu ona, ita kompara ho karreta ida karik ita atu repara mós ita la hetan ona. Ita tenke halo foun. Se ita hakarak halo reparasaun ita sei la hetan. Preokupasaun ida-ne’e mak lori ita-boot sira organiza malu hodi konvoka reuniaun ne’e atu ita fó hanoin ba malu saida maka ita bele halo. Husu ba Lautém-oan tomak atu komprometidu hodi realiza mehi ida-ne’e,” nia hateten.

Nia enkoraza katak maske buat hotu difisíl no susar maibé óinsa ho esforsu hotu ne’ebé ema hotu iha, bele uza hodi la’o neineik maibé sei hakat bebeik.

“Ita-nia mehi ho objetivu ida-ne’e ita tenke halo. Atu susar óinsa, atu difisíl óinsa ho esforsu neineik maibé ita sei hakat beibeik,” noa dehan.

Iha fatin hanesan reprezentante Sekretáriu Estadu Arte no Kultura, Eugénio Sarmento, rekoñese uma tradisionál Lautém mai ho aparensia ho nia artetoniku ne’ebé forte liu no furak tebes.

“Uma lisan iha Lautém iha tempu uluk furak tebes. Uma lulik ne’e ita labele diskute malu tanba mai hosi nia istória naruk no mai ho nia aparensia sira ne’ebé furak,” nia esplika

Eugénio Sarmento haktuir, kona-ba uma tradisionál Lautém ne’ebé reprezenta Timor-Leste, durante ne’e ema pro no kontra barak tebes maibé hosi Sekretáriu Estadu Arte no Kultura rekoñese uma tradisonál Lautém reprezenta uma tradisionál iha Timor-Leste.

“Kona-ba uma lulik, ha’u aseita katak sei iha pro no kontra hela maibé ami hosi arte no kultura ofisialmente, Sekretáriu Estadu dehan katak uma tradisional Lautém reprezenta uma tradisional iha Timor-Leste,” nia dehan.

Governu komprometidu atu fó apoiu ba renovasaun uma tradisionál Munisípiu Lautém.

“Ita hatene katak durante ne’e Governu la iha Orsamentu Jerál Estadu (OJE) maibé mai ho duodésimu no ami mós tau ona planu atu fó apoiu orsamentu balun ba rekonstrusaun. Ha’u hato’o ona pareser ba maun boot sira atu fó apoiu,” nia esplika.

Notísia Relevante: Lautém-oan iha Reinu Unidu Mobiliza Angariasaun Fundu Re-Konstrui Uma-tradisionál “Le’e-Iaval”

 Jornalista : Zezito Silva

Editór: Cancio Ximenes

HAKEREK NO HATÁN

Please enter your comment!
Please enter your name here