Kondisaun Uma Tradisionál “ Le'e-Iaval” Munisípiu Lautém. Imajen/Espesiál

DILI, 11 agostu 2020 (TATOLI)-Lautém-oan ne’ebé konsentradu iha Dili no Reinu Unidu hahú prepara-an hodi akumula forsa to’o baze, hodi re-konstrui uma tradisionál Le’e-Iaval iha Aldeai Sentrál, Suku Fuiloro, Postu administrativu Lospalos no Munisípiu Lautém.

Portavóz Komisaun Munisipál uma típika Le’e-Iaval, Pedrinho Fernandes, hateten bainhira haree ba kondisaun uma-lulik Le’e-Iaval ho kondisaun grave ona, nune’e Lautém-oan sira hahú mobiliza no organiza malu hodi harii komisaun atu kobre angariasaun fundu ba re-konstrui uma típika ne’e.

“Presiza tebes atu ita hotu hi’it netik todan ne’e iha ita kabas hodi re-konstrui Le’e-Iaval atu sai nafatin mahon kulturál no unidade nasionál tuir ai-riin haat ne’ebé reprezenta Unidade Nasionál iha emblema Estadu Direitu Demokrátiku,” tenik Portavóz ne’e liuhosi konferénsia imprensa tersa ne’e, iha resintu Asosiasaun Hak, Farol.

Notísia Relevante: Lautém-oan iha Reinu Unidu Mobiliza Angariasaun Fundu Re-Konstrui Uma-tradisionál “Le’e-Iaval”

Portavóz ne’e haktuir, hafoin Lautém-oan sira iha Reinu Unidu hamosu inisiativa harii komisaun hodi mobiliza agrariasaun fundu, maka Lautém-oan sira iha Timor-Leste apresia ho inisiativa maluk sira iha diáspora hodi fasilita re-konstrusaun Le’e-Iaval ne’ebé ho kondisaun grave no besik atu monu.

“Komunidade Munisípiu Lautein iha Dili fó mahon ba povu Lautein tomak kongratula inisiativa traballadór Lautein-oan iha Reinu-Unidu ne’ebé mak harii ona Komisaun Eventual Lee-Iaval hodi fasilita angariasaun fundu ba re-konstrusaun Uma-Lulik “Lee-iaval” iha Lospalos vila”, Portavós ne’e agradese.

Tuir nia, uma-tradisionál Le’e-Iaval nu’udar símbolu identidade kultura Munisípiu Lautém no mós símbolu identidade Timor-Leste iha mundu desde kolonizasaun portugueza  no invazaun indonéziu to’o ukun rasik-an.

“Nu’udar símbolu kulturál no mós símbolu nasionál, presiza tebes hodi ita prezerva no promove atu nafatin sai mahon kulturál no unidade nasionál ba ema timor tomak, liu-liu Lautém-oan sira”, nia akresenta.

Nune’e, nia husu ba Lautém-oan iha Dili husi Postu Administrativu, Luro, Iliomar, Lautém-Moru, Lospalos no Tutuala ne’ebé kompostu husi suku 34, prepara planu harii komisaun munisipál no grupu traballu  hodi kontribui osan ruma atu nune’e bele ajusta ho angariasaun fundu hosi Reinu-Unidu, nune’e bele rehabilita hikas Le’e-Iaval iha tempu badak.

Pedrinho mós husu ba Governu sentrál no lokál atu fó dalan legál no entedimentu administrativu hodi loke dalan ba estabelesimentu inistiva no kontribuisaun husi povu Lautém tomak iha Timor-Leste no Reinu Unidu dezignadamente re-konstrusaun Le’e-Iaval.

Nia mós konvida Lautém-oan sira, liuliu funsionáriu públiku, traballadór, estudante no estudante universitáriu sira hotu ne’ebé rezide iha Díli hodi loke idaidak ninia futar tilun hodi akompaña no partisipa harii komisaun munisipál, ekipa traballu angariasaun fundu no grupu traballu.

“Presiza mós antesipa hela osan sentavu lubuk balun hodi kontribui tanba tempu badak ekipa traballu angariasaun fundu sei la’o hale’u Díli no iha munisípiu sira, hodi vizita uma ba uma hodi bele hetan netik osan rahun oituan atu fasilita re-konstrusaun ba Le’e-Iaval,” nia fó hanoin.

Lautém-oan iha Díli mós afirma pozisaun hamutuk ho Komisaun Eventuál iha Reinu Unidu no Fárum Komunikasaun Munisípiu Lautém (FKML) hodi junta forsa koletivu ho povu Munisípiu Lautém tomak, ho administrasaun munisipál sira, autoridade lokál, entidade kultura, entidade relijioza, organizasaun komunitária, movimentu sosiál sira, asosiasaun estudante, universitáriu no juventude sira, organizasaun rezisténsia sira, antigu kombatente no veteranu sira hodi iha tempu badak harii komisaun munisipál no grupu traballu atu estabelese re-konstrusaun uma-lulik Le’e-Iaval.

Jornalista: Florêncio Miranda Ximenes  

Editora: Julia Chatarina

HAKEREK NO HATÁN

Please enter your comment!
Please enter your name here