Igreja Párokia Santa Teresinha Quelicai. Imajen TATOLI/Joanico de Araújo.

QUELICAI, 03 outubru 2020 (TATOLI)—Pároku Parókia Santa Teresinha Quelicai, Pe. Justiniano de Sousa, SDB, husu ba sarani sira liuliu sarani Parókia Quelicai atu kontinua haburas nafatin Amu João de Deus Pires nia hahalok no domin durante ne’e nia husik hela iha Parókia Santa Teresinha Quelicai.

Notísia Relevante: In Memoriam: Pe. João de Deus, “Cala-te e Vai”

“Ita tenke halo tuir saida mak Amu João de Deus Pires husik hela mai ita tanba nia fó aan tomak ba ita nune’e ita mós fó aan ba ema seluk liuliu sarani sira ne’eb’e moris namkari iha suku 15 iha Postu Administrativu Quelicai nian,” dehan Pároku Parókia Santa Teresinha Quelicai, Pe. Justiniano de Sousa, SDB, ba Agência TATOLI, sábadu ne’e.

Pe, Justiniano hateten, Amu João de Deus Pires, SDB, nu’udar misionáriu ida ne’ebé mak di’ak ba nia sarani sira no harii uma ba orfonatu sira iha Postu Administrativu Quelicai no loke eskola ba sarani sira-nia oan hodi asesu edukasaun no to’o ohin loron prodús ona matenek ua’in ba ua’in.

“Liuhosi eskola hirak ne’e ema hetan matenek no ita rekoñese katak hahalok di’ak ne’e mak durante ne’e Pe. João de Deus hatudu ba sarani sira liuliu ba sarani Parókia Santa Teresinha Quelicai nian,” Amu Justiniano hateten.

Tuir nia, Sadozu João de Deus Pires nia únika ne’ebé di’ak mak baibain nia dehan ba sarani sira katak nia la’ós hanesan ema estranjeiru maibé nia sente nia-aan hanesan timoroan ne’ebé hakarak servisu hodi halo di’ak ba timoroan sira hotu hotu maibé la’ós de’it ba Quelicai oan de’it.

Tanba Amu João de Deus ninia dedikasaun no domin be boot, nia dehan, Quelicai-oan sira hola inisiativa hodi halo memória gratidaun ba Pe. João de Deus Pires, SDB, ninia di’ak no sakrifísiu hotu mak hodi memoriza hodi harii monumentu ida ba Pe, João de Deus sai hanesan memória koletiva ida ne’ebé sei labele mate hosi jerasaun ba jerasaun.

“Nu’udar ema Salesiano ida, Amu João de Deus Pires serbi sarani sira to’o nia mate. Maibé memória furak ne’ebé amu João de Deus Pires husik hela ne’e mak sarani sira halo estátua ida ho sinál domin nian ne’eb’e sei la mate. La’ós halo Amu João de Deus nia estátua ne’e de’it maibé sarani sira tenke haburas Amu João de Deus nia domin ne’e nafatin ba nafatin,” nia dehan.

Notísia Relevante: Pe. João de Deus Nia Partisipasaun Iha Funu Hanesan “Triánglu”

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here