Bispu Dioseze Dili, Mgr. Virgílio do Carmo da Silva, SDB. Imajen/Espesiál

BAUCAU, 25 setembru 2019 (TATOLI)—Archebispu Timor-Leste, Dom Virgilio da Silva do Carmo, ohin, iha nia omilia hateten Pe. João de Deus Pires nia partisipasaun iha funu Timor-Leste hanesan triánglu ida.

“Iha entrevista ida ne’ebé jornalista Portugés ida halo ho Pe. João kona-bá Pe. João nia partisipasaun iha funu ho guerilla, Pe. João hatán hodi halo komparasaun ida hodi dehan ida ne’e hanesan triánglu ne’ebé iha nia fatin fahe ba grupu tolu ne’e mak hanesan guerilla, ki´ak, no uma kreda,” dehan Archebispu Timor-Leste, Don Virgilio da Silva do Carmo, SDB, liuhusi ninia omilia iha misa fúnebre ba Pe. João de Deus ne’ebé hala’o iha Santuarium Maria Auxiliadora, Fatumaca, Gariuai, Baucau, kuarta (25/9’2019).

Archebispu ne’e hatutan, uma kreda mak portavóz ka lian ba ema lian laek sira, guerilla mak kilat, no ki´ak mak mak isin ne’ebé mak fó apoiu ba gerilla. Ida ne’e, liafuan tolu mak amu João hatán ba jornalista sira iha Portugal halo entrevista ba nia dehan buat tolu ne’e mak hanesan  uma kreda, ki’ak, ho ita-nia maun-alin guerilleiru sira. Buat tolu labele haketak malu.

Tan ne’e mak, Dom Virgilio hatutan, amu João nia naran kódigu funu nian ema hanaran “Liras” tanba ninia partisipasaun iha funu. Maibé, ita haree, buat hotu ne’ebé durante iha tinan 64 nia laran iha rai Timór,  nia hatudu loloos mai ita ema ida ne’ebé nia domin boot tebes. Primeiru ba uma kreda, segundu ba nia vokasaun saleziana, no terseiru ba ki’ak sira. Buat tolu ne’e ita hotu haree didi’ak no ita haree, katak nia koko la haketak buat tolu ne’e iha nia vida.

“Bainhira ha’u dada-lia uitouan kona-ba Fatumaca tanba Salezianu mai kedas iha segunda espedisaun iha 1946 maibé uma Colegio Fatumaca ne’e loke iha 1874.  Nia dehan, bainhira ami tama iha ne’e, bispu husu salezianu sira atu serbisu iha misaun iha párokia. Iha tiha 1974 mak bispu dehan ba salezianu sira partikulamente dehan ba amo João nu’udar superiór momentu ne’ebá, bele buka fatin ruma harii uma  nu’udar salezianu nian,” amo hateten.

Atu dehan katak durante  tempu ne’ebá, sira tama nu’udar misionáriu, preokupasaun ida de’it mak serbi uma kreda. Amu João nia domin la halo instisaun ida ne’e katak uma kreda ne’e amu diosezanu nian, amu salezianu nian ka amu canosianu nian, maibé uma kreda ne’e ita-na’in Jesus Kristu nian.

Tuir Archebispu, buat hotu amu João halo tanba Kristu. Tanba Kristu, amu João aprende sai ki´ik no aprende sai ki’ak. Hanesan Jezús Kristu, obedese no halo tuir, aprende sai ki´ik atu bele sai aman ba sira ne’ebé aman laiha, atu bele sai belun ba foinsa’e sira, atu bele sai mestre ba sarani sira iha Timór liuliu iha Baucau.

“Hodi halo-aan sai kiik no sai ki’ak, hamamuk ninia-aan ida ne’e mak halo ita sente besik liu tan ba nia. Dalaruma nia dehan, maske ha’u malae maibé ha’u karik hatene no hadomi liu Timor ne’e liu tomoroan sira balun karik,” Don Virgilio haklaken.

Entretantu, hafoin misa fúnebre ne’e ramata reprezentante estadu liuhusi Ministra Edukasaun Juventude no Desportu, Dulce de Jesus, reprezenta Prezidente Repúbilka hodi entrega medalla kondekorasaun ba Pe. João de Deus Pires ba Vise Provensiál Salesianu Timor-Leste, Pe. António Transfiguração.

Hafoin entrega medalla de kondekorasaun, Archebispu Timor-Leste, Pe. Virgilio da Silva do Carmo hamutuk ho membrus governu, padre no madre sira, no hamutuk ho sarani atus ba rihun lori akompaña Pe. João de Deus nia isin-mate hodi ba hatuur iha semitériu Waibehana, Gariuai.

Notísia relevante:

Jornalista: Felicidade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here