KOICA-KIDC NGO Volunteer Program Manager, Choi Eun Young, entrega hela maskara ba Estudante EBC 30 de Agostu Comoro Dili, Imajen/Hortencio Sanchez.

DILI, 02 outobru 2020 (TATOLI)-Ajénsia Internasionál KOICA-KIDC iha Timor-Leste, sesta ne’e,  kontinua apoiu fasilidade prevensaun COVID-19 ba Eskola Ensinu Báziku Sentrál (EBC-sigla portugés) Comoro, Dili.

KOICA-KIDC NGO Volunteer Program Manager, Choi Eun Young, maka entrega ekipamentu hanesan  máskara 3,500, sabaun fase liman 100, hand sanitizer no thermometru eletróniku haat ba EBC 30 de Agostu iha ne’ebé simu diretamente husi Diretór eskola, Filomeno Salsinha.

 Notísia Relevante :KOICA-KIDC Oferese Ekipamentu Prevensaun COVID-19 ba EBS Faról

“Lori estudante no mestre hotu iha ne’e nia naran ha’u hato’o agradese ba KOICA-KIDC ne’ebé tulun ona ami, agradese mós ba ajuda hotu durante ne’e,” katak Filomeno Salsinha, hafoin simu apoiu ne’e iha EBC 30 agostu Dili.

Liuhosi tulun ne’e, nia dehan parte ida atu hametin liután kooperasaun entre eskola públiku ne’e ho KOICA-KIDC sai di’ak liután iha futuru.

“Agradese ba voluntáriu KOICA nian (ema na’in tolu) ne’ebé antes ne’e hala’o misaun iha ne’e ho di’ak tebes, maski sira fila ona tanba moras COVID-19 ne’e,” nia hateten.

Iha fatin hanesan KOICA-KIDC NGO Volunteer Program Manager, Choi Eun Young, hatete apoiu ne’ebé sira halo hetan mós suporta  husi organizasaun Maluk Timor hodi fó  treinamentu profesionál relasaun ho prevensaun COVID-19.

“Suporta karidade ne’e ho objetivu atu fahe koñesimentu kona-ba oinsá atu prevene virus nia transmisaun iha nasaun ida ne’e no saida mak estudante no profesór sira presiza halo atu proteje sira nia aan hosi COVID-19,”  dehan nia.

Aleinde suporta materiál prevensaun, KOICA-KIDC mós implementa eskola online durante semana rua hodi fó treinamentu desportu ba estudante hamutuk na’in 15  iha eskola 30 de Agostu.

“Aula ne’e hanesan aula prátika nian ne’ebé mak sei hanorin kona-ba tékniku oinsá atu hatene joga bola, klase online ne’e nia durasaun ba semana 4 no sei taka ho kompetisaun ba desportu kiik ho EBC faról,” Choi Eun Young, hateten.

 Notísia Relevante :KOICA-KIDC Apoiu Fasilidade Prevensaun COVID-19 ba EBF Tasi-Tolu

Jornalista: Hortencio Sanchez

Editór :Agapito dos Santos

HAKEREK NO HATÁN

Please enter your comment!
Please enter your name here