Jerente Programa Voluntária ONG KOICA-KIDC, Choi Eun Young, entrega apoiu ekipamentu prevensaun COVID-19 ba Diretóra Eskola, Orene Soares Morais.Imajen /Hortenzio Sanches

DILI, 03 jullu 2020 (TATOLI)-Ajénsia Kooperasaun Internasionál Korea (KOICA-sigla inglés) KIDC, sesta ne’e entrega ekipamentu prevensaun COVID-19 ba Eskola Ensinu Bàziku Sentrál Faról Dili.

Jerente Programa Voluntária ONG KOICA-KIDC, Choi Eun Young, maka entrega apoiu ne’e diretamente ba Diretóra Eskola, Orene Soares Morais, iha Faról.

KOICA-KIDC apoiu materiál hirak ne’e maka hanesan máskara 2.800, sabaun fase liman 100, hand sanitizer 100, termometru eletróniku rua, panfletu no manuál prevensaun coronavirus ba estudante no profesór sira.

Diretóra  EBS Faról,  Irene Soares Morais,  agradese ba tulun ne’ebé mak Ajénsia Internasionál Korea ne’e oferese hanesan materiál inklui rekursu umanu tanba haruka ona voluntáriu na’in tolu ajuda hanorin iha eskola refere.

Notísia Relevante :KOICA-KIDC Oferese Ekipamentu Prevensaun COVID-19 ba EBS 10 de Dezembru

“Maske EBS Faról laiha buat ida atu fó fila ba KOICA-KIDC maibé ami sei reza atu Maromak tulun nafatin KOICA-KIDC no komunidade Korea tomak,” katak Irene.

Iha fatin hanesan Jerente Programa Voluntária ONG KOICA-KIDC, Choi Eun Young, agradese mós ba EBS Faról tanba durante ne’e koopera ona ho voluntáriu na’in tolu hodi destaka iha eskola ne’e.

Notísia Relevante :KOICA-KIDC Apoiu Fasilidade Prevensaun COVID-19 ba EBF Tasi-Tolu

“Objetivu husi doasaun ne’e atu proteje estudante no profesór sira husi moras infeksioza COVID-19. Ami mós agradese ba Eskola Báziku Faról ne’ebé haree ona ami-nia voluntáriu sira ho di’ak,” dehan nia.

Nia espera hafoin moras pandemia globál COVID-19 bele ramata lalais nune’e voluntáriu Korea sira bele fila mai Timor-Leste.

Tuir planu, Ajénsia Kooperasaun Internasionál Korea sei fó treinamentu prevensaun no distribuisaun materiál  COVID-19 daruak sei halao iha fulan-agostu no setembru nia laran.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here