Representante KOICA KIDC iha Timor Leste entrega ekipamentu prevensaun COVID nian ba escola EBF 12 Otubru Tasitolu,Sexta 19 Juinu 2020.Imajen/Antonio Goncalves

DILI, 19 juñu 2020 (TATOLI)-Ajénsia Kooperasaun Internasionál Korea (KOICA), sesta ne’e apoiu ekipamentu prevensaun COVID-19 ba estudante Eskola Ensinu Báziku Filiál 12 de Outobru Tasi-Tolu, Dili Timor-Leste.

Materiál prevensaun coronavirus ne’ebé KOICA-KIDC oferese ba EBF Tasi-Tolu  kompostu husi máskara 8.000, sabaun fase liman 300, hand sanitizer 300, termoscan neen, tanke bee moos ida hodi fasilita estudante no profesór sira bainhira re-ativa prosesu aprendizajen.

Antes ne’e, sira mós fó ona apoiu hanesan ba EBS Faról no 10 de Dezembru Dili.

Diretóra Eskola, Filomena Casmira, agradese ba apoiu ne’ebé oferese ona husi KOICA tanba bele tulun estudante 1000-resin hodi partisipa prosesu aprendizajen.

“Nudar responsavel ba eskola ida ne’e agradese no orgullu ba KOICA ne’ebé mak tulun ona ami liliu fó materiál hodi prevene moras COVID-19 fiar katak ho sasán hirak ne’ebé fó mai ami bele fasilita ona ami-nia oan sira hodi tuir eskola ho di’ak,” katak nia hafoin simu apoiu ne’e iha EBF Tasi-Tolu, ohin.

KOICA foin dahuluk apoiu  ekipamentu prevensaun moras COVID-19 ba eskola refere hafoin moras ne’e mosu iha fulan tolu liubá.

Ho apoiu hirak ne’e maka tuir planu eskola ne’e sei komesa ninia prosesu aprendizajen ba estudante sira iha segunda semana oin.

“Estudante sira sei hahú eskola semana oin abertura ba ensinu aprendizajen halo tiha ona iha Eskola 30 de Agostu, entaun ami nian fatin prepara hotu ona, kada aula labarik hamutuk 30 de’it,”nia esplika.

Iha biban hanesan Jestór NGO ba Programa Voluntáriu, Choi Eun Young, informa apoiu ne’e sei tulun profesór ho estudante sira hodi halo prevensaun ba propagasaun COVID-19.

“Objetivu ami nian hodi fó apoiu ba eskola sira atu hadok alunu no mestre sira husi moras coronavirus,” dehan Choi.

Aleinde, EBF 12 de Outobru Tasi-Tolu, KOICA-KIDC mós oferese ona apoiu hanesan ba EBS Faról no EBS 10 de Dezembru Comoro.

Jornalista   : Hortencio Sanchez

Editór         : Agapito dos Santos

HAKEREK NO HATÁN

Please enter your comment!
Please enter your name here