Timoroan tuir treinamentu ba programa saemaul Undong iha Korrea. Imajen/Espesiál.

DILI, 30 setembru 2020 (TATOLI)–Governu liuhosi Ministériu Administrasaun Estatál (MAE) sei habelar programa Saemaul Undong iha munisípiu sira inklui RAEOA-ZEESM hahú hosi 05 outubru to’o 13 novembru 2020, hodi halo diseminasaun kona-ba programa Saemaul Undong nune’e bele hakbesik dezenvolvimentu polítika ne’ebé fó enfaze.

Notísia Relevante: Kada tinan, Saemaul Undong aloka orsamentu $20 mill ba komunidade

Tuir nota komunikadu hosi Ministériu Adminsitrasaun Estatál (MAE) katak presiza hahú ona programa Saemaul Undong tanba aplikável ba Timor-Leste prodús tuir kultura, polítika, sosíu no ekonómiku atu muda povu nia moris ba moris di’ak. 

“Ita presiza eduka povu atu labele iha dependénsia de’it ba Governu maibé povu tenke sai na’in no autór ba dezenvolvimentu tuir prátika ne’ebé hahú ona iha Munisípiu Lautém,” haktuir nota ne’ebé mak Agência TATOLI asesu hosi MAE, kuarta ne’e.

Tuir planu, Governu sei hili aldeia balun hosi munisípiu selesionadu no elizível tuir kritériu atu implementa programa Saemaul Undong iha mandatu VIII Governu Konstitutionál iha tinan 2021, nune’e bele uza nu’udar referénsia, armonizasaun ba PNDS ho Saemaul Undong formaliza no  institusionaliza iha MAE.

Tema ba sosializasaun mak “Ita Bele, Hahú Agora no Tenke Halo Ba Moris Di’ak”.

Nota ne’e haktuir, VIII Governu konstitutionál liuhusi Ministériu Administrasaun Estatal (MAE) parseria hamutuk ho Gabinete Primeiru-Ministru ho Embaixada Korea no KOICA organiza ona konferénsia nasionál ba programa Saemaul Undong  ba programa iha nivel nasionál.

Tuir nota ne’e haktuir, iha konferénsia nasionál ne’e konvida entidade estadu, autoridade lokál, emprezáriu, organizasaun naun govermentál hodi rona lisaun ne’ebé aplika ona iha Timor-Leste ho fundu prinsipál hosi Fundasaun Saemaul no Korea Sul.

Durante konferénsia nasionál, Governu hili Munisípiu Lautém nu’udar oradór importante iha konferénsia nasionál hanesan pilotu ba projetu Saemaul Undong iha Timor-Leste no sai world reference no prátika dezenvolvimentu komunitária ho partisipativa, ativu produtivu, responsável no sustentável. 

Iha Timor-Leste programa Saemaul Undong implementa ona iha aldeia haat nomeadamente Aldeia Chauluturu, Chaivaicha, Bauro no Luarai ne’ebé lidera diretamente hosi lideransa aldeia sira no espiritu voluntáriu, servisu badinas, kooperativu ka servisu hamutuk ho vontade liuhosi programa tolu (3) mak muda mentalidade, hadi’a ambiénte, hasa’e rendimentu ekonómia hosi baze nu’udar aliserse ba nasaun.

Notísia Relevante: Governu TL agradese governu Korea Súl ba apoia Programa Saemaul Undong

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here