Vice-Ministru Administrasaun Estatal, Lino de Jesus Torezao. Imajen/Antonia Maia Gusmao

DILI, 06 agustu 2020 (TATOLI)–Governu Timor-Leste liuhosi Gabinete Primeiru-Ministru, Ministeriu Administrasaun Estatál (MAE) hamutuk ho Embaixadór Korea Súl iha Timor-Leste halo kooperasaun kona-ba programa Saemaul Undong ka “Ita bele halo ida-ne’e” hodi hakbiit povu nia  moris.

Vise-Ministru Administrasaun Estatál, Lino de Jesus Torrezão, hateten Timor-Leste presiza Fundasaun Saemaul Undong tanba liuhosi programa ida-ne’e bele lori mudansa dezenvolvimentu sosiál ekonómia liuliu iha suku.

“Ha’u hakarak lori Governu nia naran hato’o agradese ba Fundasaun Saemaul Undong iha Timor-Leste, tanba ita presiza tebes programa ida-ne’e tanba liuhosi programa ne’e bele hakbesik-aan ba povu liuliu iha área rurál sira hodi hakbit povu nia moris loro-loron nian,” dehan Lino de Jesus Torrezão liuhosi nia diskursu iha Konferénsia Nacional Saemaul Undong ne’ebé hala’o iha Salaun Auditorium Ministériu Finansa, Aitarak-Laran, Dili, kinta ne’e.

Vise-Ministru MAE ne’e dehan, programa Saemaul Undong ne’e di’ak tebes ba povu Timor-Leste tanba hosi ne’e bele lori mudansa dezenvolvimentu sosiál ekonómia kontabilizadu ne’ebé mak lalais tanba povu rasik maka sai implementadór ka autór ba ninia implementasaun.

Programa Saemaul Undong nu’udár programa ida-ne’ebé espesífiku tebes ho nia orijen hosi Repúblika Korea Súl ne’ebé implementa ona iha nasaun barak no hetan susesu bo’ot hodi hakbiit povu nia moris loro-loron nian tanba programa ne’e sai ona movimentu globál ho naran Saemaul Global.

“Susesu sira-ne’ebé durante ne’e komunidade Munisípiu Lautém atinji maka kontrola sira-nia aldeia sai moos, loke estrada no halo instalasaun ba bee-moos. Buat sira-ne’e hotu komunidade maka hola inisiativa rasik hodi promove sira-nia aldeia, ne’e onra ne’ebé espetativa,” nia dehan.

Programa Saemaul Undong implementa iha Timor-Leste,  hahú iha tinan 2016 bainhira Timor-Leste asina akordu bilaterál ho Governu Korea Súl no hili Munisípiu Lautém mak sai hanesan pilotajen ida ba projetu Saemaul Undong ninian.

Nia hateten, durante implemeta  hahú hosi 2016 to’o 2020 foin  programa ne’ebé implemeta maka hanesan kuda aifunan, luda modo. hakiak animál hanesan karau, fahi, manu, no loke mós negósiu kiik sira.

Nia dehan, planu esensiál ne’ebé ba oin halo maka Ministériu Adminitrasaun Estatál, PNDS, sei serbisu hamutuk ho Saemaul Undong sei habelar programa ne’e ba munisípiu 12 inklui Rejiaun Administrativu Espesiál  Oé-Cusse Ambeno (RAEOA).

Saemaul Undong nia Istória

Programa Saemaul Undong nu’udar programa prinsipál hosi Korea Súl liuliu iha tinan 1970 to’o 1980 ninian nu’udar rural development program ne’ebé to’o agora nasaun sira iha mundu mós banati tuir.  

Saemaul Undong signifika nu’udar movimentu dezenvolvimentu suku foun. Maski haree baibain de’it maibé iha buat lubuk ida mak halo diferensa programa ne’e ho rural development program sira seluk liuliu iha partisipasaun komunidade nian. Programa ne’e susesu sai sasukat ba kresimentu ekonomia iha área rural ka suku nian.

Programa Saemaul Undong hala’o kampaña ho espiritu “We can do it” (ita bele halo ida-ne’e) ne’ebé inkluindu ho self-help, diligence, dan cooperation iha komunidade nia leet ne’ebé hetan ona rekuñesimentu hosi Organizasaun Nasaun Unida (ONU) nu’udar organizasaun internasionál ida ne’ebé sai hanesan modelu dezenvolvimentu ida ne’ebé efetivu tanba provas hatudu katak bele hamenus mukit (kiak) iha área rural ka suku.

Jornalista  : Osória Marques

Editór       : Cancio Ximenes 

HAKEREK NO HATÁN

Please enter your comment!
Please enter your name here