Semana oin, administradór no prezidente autoridade sei tuir ezame
DILI, 24 setembru 2020 (TATOLI)-Ministru Administrasaun Estatál (MAE), Miguel Pereira de Carvalho informa, iha semana oin ne’e administradór no Prezidente Autoridade sira sei tuir ezame ba rekrutamentu purméritu.
Miguel Pereira de Carvalho hateten, Governu liuhosi MAE halo ona hahú ona nia prosesu loke vaga ba Administradór Munisipál no Prezidente Autoridade iha Munisípiu Ainaro, Aileu, Baucau, Covalima, Lospalos no Viqueque, no munisípiu tolu mak admitidu ona atu tuir ezame.
“Rekrutamentu ba administradór munisipál no Prezidente Autoridade sira, ita hahú ona nia prosesu loke vaga ba munisípiu neen (6) Ainaro, Aileu, Baucau, Covalima, Lospalos no Viqueque. Munisípiu tolu mak admitidu ona atu tuir ezame iha segunda semana oin no tolu seluk sei tuir ezame iha tempu badak,” Miguel Pereira de Carvalho dehan ba jornalista sira hafoin partisipa enkontru ho komisaun A iha Parlamentu Nasionál, Dili, kinta ne’e.
Nia hateten, hein katak prosesu tuir baze legál ne’ebé mak temi iha enkuadramentu legál regula kona-ba rekrutamentu purméritu ba administradór munisipál no Prezidente Autoridade sira.
Nia dehan bainhira munisípiu neen (6) konklui ona mak sei kontinua no avansa ba fali munisípiu seluk. Rekrutamentu purméritu ne’e tenke kobre hotu munisípiu hotu-hotu iha Timor-Leste tanba tuir prosesu legál.
Tanba ne’e, tuir nia, munisípiu neen (6) ne’e sei konklui iha tinan ne’e no munisípiu sira seluk parese sei akontese iha tinan oin.
“Tinan ne’e ita konklui hotu tiha munisípiu neen depois munisípiu seluk ita sei implementa iha segundu trimester tinan 2021,” nia dehan.
Ho nune’e, nia dehan atu garante okupante, dirasaun no xefia sira inklui kargu adminstradór no Prezidente Autoridade sira bele ezerse sira-nia funsaun tuir mandatu ne’ebé temi iha lei nian.
“Ita tenke regulariza mandatu adminisitradór no Prezidente Autoridade atuál sira no mandatu ne’ebé mak pratikamente tanba sira hanesan funsionáriu públiku no sira kontinua hela nafatin ne’ebá to’o foun mai mak subtitui”, governante ne’e hatete.
Mandatu administradór munisipál no prezidente Autoridade Munisipál sira hatuur ona iha dekretu lei númeru 03/2016, ne’ebé ikus mai altera ho dekretu lei númeru 09/2018. Razaun halo rekrutamentu tuir méritu ba administradór sira tanba bazea ba lei ne’ebé atribui ona iha dekretu lei númeru 03/2016.
Jornalista: Osória Marques
Editór: Cancio Ximenes
