Ministru Administrasaun Estatál, Miguel Pereira de Carvalho. Imajen Tatoli/Egas Cristovão

DILI, 29 setembru 2020 (TATOLI)-Ministériu Administrasaun Estatál (MAE) halo ona ezame ba kandidatu administradór hosi munisípiu Baucau Viqueque, no Lospalos.

“Ba munisípiu tolu ne’e ezame halo ona horiseik, ne’ebé semana ida ka semana oin parese bele fó sai ona rezultadu. Enkuantu Ainaro no Aileu, kandidatu sira ami fó sai ona avizu katak ezame sei raliza iha fulan-outubru nia-laran,” dehan Ministru Administrasaun Estatál, Miguel de Carvalho, hafoin partisipa iha diskusaun Komité Revizaun Orsamentu Polítiku (KROP), iha Ministériu Finansa, tersa ne’e.

Kandidatu administradór munisípiu tolu hamutuk na’in-24, maibé ema na’in-23 de’it maka tuir ezame, ida la mai tuir teste tanba ne’e ekipa organizadora esklui ona.

Kandidatu administradór hosi munisípiu Lautém hamutuk na’in-sia no agora membru juri sira hahú ona kuruji matéria ezame.

Ekipa juri mai hosi Komisaun Funsaun Públika (CFP, sigla portugés) no MAE, ne’ebé estabelese kritériu barak ba vaga adminstradór munisípiu.

“Sai kandidatu administradór no prezidente autoridade tenke funsionáriu públiku no iha grau  tékniku superiór, bainhira laiha grau ne’e tenki ezerse kargu dirijente hanesan funsionáriu públiku. Se la’ós funsionáriu públiku, entaun idade tenke tinan 45 ba leten no iha esperiénsia profisionál  iha aréa administrasaun pelu menus tinan-lima no kritériu seluk tan,” governante ne’e esplika.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here