Ministra Edukasaun, Juventude no Desportu, Dulce de Jesus Soares

DILI, (TATOLI) – Ministra Edukasaun no Juventude, Dulce de Jesus Soares, katak Ministériu Edukasaun no Juventude no Desportu (MEJD), liuhusi lei baze edukasaun nian iha ona polítika ba edukasaun inkluziva,  aprova ona iha Konsellu-Ministru mezmu la temi LGBT (Lesbian, Gay, Biseksuál, Tranjender).

“Karik iha ne’ebá la temi liafuan ida ne’e, maibé bainhira ita dehan katak la iha diskriminasaun, ba buat hotu kedas, inklui sira ne’ebé tama iha kategória LGBT”, dehan ministra, Dulce de Jesus, perante estudante no funsionáriu MEJD no seluk tan, iha salaun Komisaun Nasionál ba Eleisaun (CNEsigla portugés), Kolmera, segunda lorokraik.

Ministra akresenta dalaruma ita temi LGBT, maibé ita mós la espera no rekoñese ne’e hanesan ofensa ida ba ema ruma no bele nu’udar mós diskriminasaun ida.

“Se ita komprende, ita-nia konstituisaun konsagra tiha ona; ne’e buat ida ne’ebé ita labele halo”, governante ne’e fó hanoin.

Nia dehan MEJD nia papel mak iha kuríkulu ensinu báziku, primeiru to’o segundu síklu, ko’alia asuntu sira ne’e integradu.

“Bainhira hanorin ba labarik ida kona-ba respeita ema seluk hanesan respeita án rasik, labarik ne’e otomatikamente. Sé profesór ida hanorin nia ho loloos, hatene respeita ema ne’e importante”, katan tan.

Nia esplika ita hothotu hanesan umanu, tenke tau respeitu ne’e hanesan buat ida aas, husi ki’ikoan kedas, hahú husi pré-eskolár.

Nune’e MEJD garante iha lei baze edukasaun nian, polítika edukasaun, kuríkulu inklui husu mós ba Konsellu Estudantil atu tau-matan mós kestaun estigma iha eskola.

“Karik iha kolega ruma ne’ebé mak nia atitude ba iha ne’ebá (LGBT), la’ós atu ba goza nia no iha estudante ruma la respeitu, fó hatene profesór sira”, nia sujere.

Dulce de Jesus Soares hateten hanesan sarani, inklui konfisaun reliojioza sira seluk hanorin mós kona-ba oinsá respeitu malu no hadomi malu nu’udar kriatura Maromak nian.

“Respeita ema seluk hanesan respeita aan rasik”, konklui ministra.

Notísia relevante; http://www.tatoli.tl/2018/09/labele-halo-diskriminasaun-ba-lgbt/

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here