Prezidente Parlamentu Nasionál, Aniceto Guterres. Imajen /Egas Cristóvão.

DILI, 29 setembru 2020 (TATOLI)—Parlamentu Nasionál (PN) aprova ona orsamentu privativu iha finál globál ho montante $16.984.066 ba tinan fiskál 2021.

Notísia Relevante: Orsamentu Privativu PN aprovadu iha faze jeneralidade

Parlamentu Nasionál aprova montante orsamentu $16.984.066 ne’ebé fahe ba saláriu no vensimentu $5.581.083, bens no servisu $6.250.029, kapitál minór $492.796, kapitál dezenvolvimentu $3.000.000 no transferénsia públika $1.462.000.

Iha prosesu dikusaun ne’e Parlamentu Nasionál aprova kada kategoria hahú hosi saláriu no vensimentu, bens (sasán) no servisu, kapitál minór, kapitál dezenvolvimentu no transferénsia públika.

Hafoin aprova kada kategoria ka rúbrika orsamentu ne’e,  aprova kedas orsamentu privativu ho rezultadu votasaun a-favór 41 Kontra 0 no abstensaun 8.

Prezidente Parlamentu Nasionál, Deputadu Aniceto Longuinos  Guterres Lopes, fó-sai katak orsamentu privativu aprova ona iha finál globál.

“Nune’e orsamentu privativu Parlamentu Nasionál ba 2021 nian aprovadu iha plenária Parlamentu Nasionál,” Deputadu Aniceto Guterres prounsia liuhosi plenária, Parlamentu Nasionál, tersa ne’e.

Entretantu Prezidente Komisaun C (Finansa Públika), Deputada Maria Angélica Rangel, dehan oramentu parlamentu nian aprova ona maibé ko’a tiha verba balun hosi viajen estranjeiru.

“Ohin proposta viajen estranjeiru tau fali ba viajen lokál, ko’a atu fó subsídiu tékniku sira iha komisaun espesializada kona-ba pulsa, verba hosi viajen estranjeiru ne’e tau fali ba iha atividade grupu parlamentár sira. Viajen estranjeiru ne’e propoin de’it bai ha reuniaun boot rua, CPLP no Uniaun Europeia,” Deputada Maria Angélica hateten.

Konsellu Administrasaun Parlamentu Nasionál propoin viajen estranjeiru ho montante $1.403.568 ne’ebé prevee iha kategoria bens (sasán) no servisu prevee ba Parlamentu Nasionál $1.193.889, Gabiente Preziddente Parlamentu hamutuk 143.008, Gabinete Sekretáriu Jerál $31.616, diresaun komunikasaun $11.239, divizaun protokolu $23.816.

Prezidente Komisaun C ne’e dehan, verba balun hosi viajen estranjeiru ko’a balun ba viajen lokál, fó subsídiu ba ekipa tékniku iha komisaun no apoia atividade grupu joven parlamentár, hela de’it mak viajen ba CPLP no Uniaun Europeia.

Notísia Relevante: Konsellu Administrasaun PN propoin millaun $1-resin ba viajen estranjeiru

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here