Prezidente Parlamentu Nasionál, Aniceto Longuinhos Guterres Lopez.

DILI, 29 setembru 2020 (TATOLI)—Orsamentu privativu Parlamentu Nasionál aprovadu iha faze jeneralidade ho montante $16.984.066 no prosesu diskusaun tuir mai sei tama faze espesialidade.

Notísia Relevante: Konsellu Administrasaun PN propoin millaun $1-resin ba viajen estranjeiru

Rezultadu votasaun ba orsamentu privadu iha faze jeneralidade ne’e a-favór 39, kontra 0 no abstensaun 19.

“Nune’e, orsamentu privadu Parlamentu Nasionál nian ba tinan fiskál 2021 nian aprovadu iha jeneralidade, lorokraik ita tama ba espesialidade,” Prezidente Parlamentu Nasionál, Deputadu Aniceto Longuinhos Guterres Lopes, informa liuhosi plenária Parlamentu Nasionál, tersa ne’e.

Hosi orsamentu $16.984.066 ne’e fahe ba saláriu no vensimentu $5.581.083, bens no servisu $6.250.029, kapitál minór $492.796, kapitál dezenvolvimentu $3.000.000 no transferénsia públika $1.462.000.

Montante orsamentu koloka ba saláriu no vensimentu hamutuk $5.581.083 ne’e sei selu saláriu no vensimentu, oras estraordinária sira no oras estra.

Nune’e mós, bens (sasán) no servisu $6.250.029 prevee ba viajen lokál, viajen estranjeiru, formasaun profisionál no semináriu, emcargos com instalações, arrenamentu ba propriedade, kombustível ba operasaun veíkulu, manutensaun veíkulu, seguros, rendas e serviços, materiál no fornesimentu operasionál, kombustível ba jeradór, manutensaun ba ekipamentu no edifísiu, serbisu operasionál, asisténsia téknika, servisu tradusaun, servisu diversu sira seluk, pagamentu kuota no servisu catering.

Hosi parte kapitál minór prevee ba kompra veíkulu, ekipamentu informátika, ekipamentu seguransa, ekipamentu ba komunikasaun parlamentu nian, ekipamentu diversu sira seluk, mobiliáriu, ekipamentu sira seluk kona-ba eskritóriu no ekipamentu água.

Hosi parte kapitál dezenvolvimentu prevee ba infraestrutura ativu sira, servisu no akipamentu menores no kategoria transferénsia sei hala’o pagamentu ba pesoál sira no konsesaun públika.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here