Parlamento Nasional. Imajen Tatoli/Egas Cristovão.

DILI, 29 setembru 2020 (TATOLI)—Konsellu Administrasaun hosi Parlamentu Nasionál (KA-PN) propoin $1.403.568 ba viajen estranjeiru iha proposta tinan fiskál 2021 nian.

 Notísia Relevante: PN hahú diskute orsamentu privativu 2021 ho montante $16.984.066

Hosi orsamentu $1.403.568 ne’e prevee iha kategoria bens (sasán) no servisu prevee ba Parlamentu Nasionál $1.193.889, Gabinete Prezidente Parlamentu hamutuk 143.008, Gabinete Sekretáriu Jerál $31.616, dirasaun komunikasaun $11.239, divizaun protokolu $23.816.

Entretantu Komisaun Espesializada Permanente sira hahú hosi Komisaun A, B, C, D, E, F no G la prevee verba orsamentu ruma ba 2021.

Ho proposta ba viajen estranjeiru ne’e, Prezidente Komisaun D (Ekonomia no Dezenvolvimentu), Deputadu Antoninho Bianco, la konkorda proposta ne’e tanba oras ne’e mundu hasoru hela propagasaun surtu COVID-19.

“Tuir loloos osan ba viajen estranjeiru ko’a hotu, tanba ha’u haree Organizasaun Nasaun Unida (ONU) mós hala’o enkontru la’ós ema atu ba, Prezidente Repúblika iha fatin hotu ko’alia liu de’it hosi meiu komunikasaun, ne’ebé ita lalika buka moras. Parlamentu nian ko’a hotu mós di’ak liután. ONU mós uza meiu hanesan ne’e entaun ita atu halo saida tán,” Deputadu Antoninho Bianco, fó hanoin iha ámbitu debate orsamentu privativu PN 2021, iha plenária PN, tersa ne’e.

Nia dehan, viajen lokál ho kontante ho montante $680.008 bele mantein maibé plenária hanesan soberana mak deside.

Entretantu, Deputada Bankada CNRT, Carmelita Caetano Monis, konkorda ideia Deputadu Antoninho Bianco nian katak tenke ko’a hotu viajen estranjeiru ne’e.

“Ha’u husu esplikasaun kona-ba viajen estanjeiru ne’ebé tau ba Parlamentu Nasionál ho montante $1.403.568. Lahatene, ita atu halo viajen estranjeiru ba iha-ne’ebé no COVID-19 ne’e mundu tomak seidauk hatene bainhira mak hotu. Iha situasaun ida hanesan ne’e tau kedas millaun $1-resin ne’e ba saida nian,” Deputada Bankada Opozisaun ne’e kestiona.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here