Diretór Ezekutivu FONGTIL, Daniel Santos do Carmo. Imajen Tatoli/António Gonçalves

DILI, 29 setembru 2020 (TATOLI)—Diretór Ezekutivu Forúm Organizasaun Naun Gobernamenta Timor-Leste (FONGTIL), Daniel Santos do Carmo, konsidera direitu asesu informasaun hanesan direitu fundamentál ida ba komunidade sira atu asesu informasaun.

Notísia Relevante: Asesu informasaun universál, MAPKOMS kompromete lori informasaun to’o área rurál

“Direitu informasaun ne’e hanesan direitu fundamentál ida ba komunidade sira atu asesu informasaun. Tanba ne’e, Estadu no Governu tenke garante ema hotu-hotu hodi bele asesu ba informasaun saida de’it mak akontese iha mundu liuliu iha Timor-Leste,” dehan Diretór Ezekutivu FONGTIL, Daniel Santos do Carmo, ba Agência TATOLI relasiona ho Loron Mundiál Asesu Informasaun Universál iha loron 28 setembru ne’e, nia knaar fatin, Caicoli, Dili, foin lalais ne’e.

Diretór ezekutivu ne’e haktuir, nasaun ida iha liberdade atu simu informasaun ruma no atu ko’alia buat loos ba públiku importante tebes. Tanba, hanesan sosiedade sivíl, ema hotu halo servisu para oinsá kontribui no oinsá asegura katak informasaun ba públiku garantidu no kanál hotu ne’ebé fó sai informasaun tenke kanál ne’ebé kredivel, loos no onestu ba sosiedade.

Tanba, nia dehan, jornalista ida bainhira fó sai informasaun ne’ebé mak loos hanesan aktu ida hodi eduka, kumpre lia-loos no evita informasaun ne’ebé bosok no fó sai informasaun hanesan ba ninia interesse bosok no lohi ninia povu.

Atu garante, nia hateten, ema hotu-hotu iha liberdade hodi asesu ba informasaun entaun mídia nia papél importante tebes, tanba iha nasaun demokrátiku hanesan Timor-Leste, sé mak transmite informasaun ho loos no momoos  mak mídia.

“Entaun ho komemorasaun loron mundiál asesu informasaun universal ne’e mak ita tenke enkoraja ita-nia mídia privadu no Estadu nian, tenke fornese informasaun ho loloos no evita informasaun bosok sira nu’udar papél mídia nian atu eduka ita-nia povu.” Nia dehan.

Nia dehan, atu iha opurtunidade ba komunidade sira hodi asesu informasaun mak Estadu no Governu tenke garante komunidade nia direitu asesu informasaun universal ne’e loloos.

“Opurtunidade atu hetan informasaun tenke liuhosi kanál oin-oin hanesan teknolojia ne’ebé mak liuhosi kanal televizaun, rádiu, imprime inklui online sira katak atu asegura informasaun ho intensaun la’ós ba ema ne’ebé asesu informasaun ne’e maibé tenke assegura mós ema sira iha área rural,” nia dehan.

Opurtunidade atu hetan informasaun, nia dehan, iha mós dezafiu ba públiku atu asesu ba informasaun hanesan kustu ida-ne’ebé karun tebes sai hanesan dezafiu ida ba Timor-Leste, tanba ne’e komunidade sira defísil asesu ba informasaun.

Dezafiu seluk, nia hateten, komunidade sira laiha koñesementu atu asesu informasaun iha mídia sira, tanba ema uitoan de’it mak bele asesu informasaun iha mídia sosiál hanesan facebook atu hetan informasaun ho folin barratu no disponível to’o iha área rural no ema hotu bele asesu internet ho loloos.

Nia dehan, bainhira ema sira iha Dili mak asesu no hatene saida mak akontese mak direitu asesu informasaun ne’e bele sukat, maibé ema iha rurál mak la asesu no la hatene informasaun ne’ebé mak akontese mak direitu asesu ba informasaun ne’e laiha.

“Ida-ne’e bele ita bele dehan katak komunidade iha urbana asesu informasaun di’ak liu kompara ho ema iha rurál laiha. Tanba, internete menus ka laiha no problema eletresidade inklui laiha kapasidade atu asesu interenet no asesu ba teknolojia,” nia dehan.

Notísia Relevante: Asesu informasaun universál, SEKOMS husu parte hotu kontribui informasaun kredível

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here