Loron mundiál asesu informasaun universál. Imajen/current affairs

DILI, 28 setembru 2020 (TATOLI)Relasiona ho loron mundiál asesu informasaun universál ne’ebé sempre selebra iha 28 setembru kada tinan, hahú desde tinan 2015, Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’ husu ba parte hotu iha Timor-Leste hodi kontribui informasaun kredível.

“Ita tenke fasilita informasaun kredível no loos iha kontextu atuál ba sidadaun sira, nune’e la konsumu infomasaun hoax,” tenik Sekretáriu Estadu Akara, ba Agência Tatoli, iha ninia knaar fatin, Palásiu Governu, segunda ne’e.

Notísia Relevante: SEKOMS lansa kampaña nasionál kontra hoax no promove internet saudável

Governante ne’e konsidera, loron ne’e nu’udar reflexaun ba timor-oan hotu.

“Loron mundiál ba informasaun ita konsidera hanesan momentu ida atu halo reflexasaun, liuliu ba ita-nia nasaun, katak ita uza informasaun durante ne’e ho di’ak ka lae? no posizitivu ka lae?, hafoin ita bele jere situasaun atuál ne’ebé maka durante ne’e nakonu ho informasaun hoax ka lia falsu ne’ebé ataka malu iha rede sosiál,” nia subliña.

Tuir membru ezekutivu ne’e, importante maka parte hotu kontribui divulga informasaun ne’ebé kualidade.

“Agora reflexaun ida ba futuru maka oinsá ita tenke kontribui ba setór informasaun maka’as liután ne’ebé maka kolabora ho nasaun seluk, nasaun viziñu, institusaun internasionál sira, atu hamutuk fó informasaun  kredível, la’ós Timor-Leste de’it maibé iha mundu,” nia fó hanoin.

Sekretáriu Estadu ne’e dehan, atu kontribui ba asesu informasaun universál presiza kontribuisaun parte hotu.

“Ita  iha responsablidade ba mundu tanba ita lakohi sidadaun iha mundu ne’e monu ba era nakonu ho lia falsu,” nia akresenta.

Antes ne’e, iha loron 18 setembru Governu liuhosi SEKOMS lansa kampaña nasionál kontra hoax no promove internet saudável.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here