Loron mundiál asesu informasaun universál 2020. Imajen/planeta

DILI, 28 setembru 2020 (TATOLI)-Liuhosi Asembleia Jerál Organizasaun Nasaun Unida (ONU) ba dala-74, proklama katak loron 28 setembru hanesan loron mundiál asesu informasaun universál, ne’ebé hahú selebra iha tinan 2015.

Selebrasaun loron mundiál asesu informasaun universál iha tinan ne’e, ONU konsentra ba direitu asesu informasaun iha tempu krize nia-laran, haree mós ba vantajen garantia konstituisaun, estatutu no polítika asesu informasaun, nune’e bele salva moris nu’udar umanu, kontrui konfiansa, ajuda formulasaun polítika ne’ebé sustentável durante krize pandemia COVID-19.

Relasiona ho loron ne’e, Ministru Asuntu Parlamentár no Komunikasaun Sosiál, Francisco Jerónimo, felisita no promete sei disponibiliza asesu informasaun to’o área rurál maski iha difikuldade balun.

”Ita hotu haksolok tanba bele iha loron importante ne’e, atu nune’e ita bele iha asesu informasaun maski rekoñese katak informasaun seidauk to’o ba komunidade balun, tanba ne’e Governu sei haka’as-an iha tempu tuir mai informasaun bele to’o iha área rurál,” tenik Ministru Francisco, ba Agência Tatoli, foin lalais ne’e iha salaun Ministériu Komunikasaun Sosiál, Caicoli.

Governante ne’e dehan, sei esforsu halo dijitalizasaun ba Rádiu Televizaun Timor-Leste, Empreza Públika (RTTL,E.P) atu komunidade iha nível hotu bele asesu informasaun ho di’ak.

“Ita hahú daudaun halo kooperasaun ho Xina, atu nunee dijitaliza ita-nia mídia estatál RTTL no ikus mai bele lori informasaun ba komunidade to’o área rurál,” nia akresenta.

Biban ne’e, membru ezekutivu ne’e husu sidadaun Timor-Leste konsumu informasaun ho di’ak hodi kontribui ba dezenvolvimentu.

“Husu ba ita hotu uza didi’ak informasaun ne’ebé asesu atubele ajuda ita-nia dezenvolvimentu no eleva kapasidade pesoál,” nia apela.

Ba mídia estatál seluk, Ministru ne’e konsidera presiza koloka korrespondente Agência Tatoli to’o área rurál atu garantia informasaun to’o nível hotu.

“Agência Tatoli iha ninia papél importante, ita presiza tau jornalista iha nível munisípiu sira, nune’e sira mós bele informa ba povu iha baze kona-ba lala’ok iha territóriu nasionál. Loron mundiál asesu informasaun universál, ema hotu presiza asesu informasaun,” nia subliña.

Aleinde ne’e, Governu liuhosi MAPKOMS no Sekretaria Estadu Komunikasaun Sosiál (SEKOMS) kontinua disemina informasaun, liuhosi programa ‘Naroman ba Suku’ ne’ebé maka iha ona.

“Ita uza programa Naroman ba Suku, atu nune’e lori infomasaun sira iha mídia hanesan revista, jornál, no meiu saida de’it bele lori to’o nível suku, nune’e komunidade iha área rurál sira bele asesu informasaun di’ak,” nia fó hanoin.

Durante tinan 2019 to’o 2020, Governu implementa ona programa ne’e iha suku ualu, ne’ebé suku tolu lokalizadu iha parte leste, hanesan Hae-coni iha postu administrativu Baguia, munisípiu Baucau, suku Muapetine no Lore II iha munisípiu Lautém, parte sul iha suku Liurai, munisípiu Aileu no suku Rotuto, iha munisípiu Manufahi, enkuantu parte oeste iha suku Leo-hitu no Soelesu iha munisípiu Bobonaro no suku Batumanu, postu administrativu Atsabe, munisípiu Ermera, no tuir planu tinan 2021 sei implementa tan iha suku haat.

Ba kada suku ne’ebé sai benefisiáriu, Governu fó apoiu orsamentu maizumenus $10.000 liuhosi transferénsia públika hodi harii Sentru Informasaun ba komunidade no implementa programa ‘Naroman ba Suku’ hodi pasa informasaun hosi nível nasionál ba suku, nune’e mós kontrátriu.

Aleinde ne’e, MAPKOMS mós hakarak kontinua programa Rádiu Komunidade, atu nune’e bele fó informasaun ba ita-nia komunidade sira.

Atu hafasil asesu Rádiu Komunidade, iha 29 maiu 2020 Governu lansa rádiu streaming online ba Rádiu Komunidade 14 ne’ebé bele asesu liuhosi sítiu eletróniku ho ligasaun internet.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here