JornalistaTatoli halo hela entervista ho MNEK, Adlajiza Magno.

DILI, 28 setembru 2020 (TATOLI)-Ministra Negósiu Estranjeiru no Kooperasaun (MNEK), Adaljiza Magno, hateten iha tinan 2021, sei prioritiza mós ba servisu multilaterál liliu servisu ho Organizasaun Internásionál sira para kombate COVID-19.

“MNEK nia prioridade tanba haree ba COVID-19 ne’e ita tenke aserta liután ita-nia servisu iha multilaterál, ita tenke aserta tan servisu ho Organizasaun Internasionál barak no ita tenke servisu tan ho nasaun sira seluk para hodi kombate hamutuk COVID-19 ne’e,” nia hateten ba jornalista sira iha edifísiu Ministériu Finansa, Aitarak-laran, segunda ne’e.

Notísia Relevante :MNEK hamenus osan viajen estranjeiru

Nia dehan Pandemia Globál afeta ba servisu hotu, tanba ne’e Governu tenki servisu maka’as liután no mós fó solidaridade ba malu atu oinsá kombate moras globál Coronavirus.

Entretantu, atu apoiu servisu hirak ne’e presiza orsamentu sufisiente tanba ne’e iha tetu fiskál 2021, MNEK prevee purvolta millaun $ 30.

“Hosi Ministeriu Finansas fó mai ami iha 22 miloens maibé ami husu tan adisional tanba 22 miloens ne’e lá to’o tenke hamutuk 28 to’o 30 millaun maibé sei diskute, nune’e bele haree ba prioridade multilateral nian tanba haree ba pos COVID-19,” nia dehan.

Enkuantu, OJE 2020 nian, Adalzija Magno, relata tuir proposta antes ne’e, MNEK propoin millaun $ 26-resin ba tetu fiskál 2020, maibé agora tenki redúz ba millaun $ 20,787,774.

Husi totál millaun $ 20-resin ne’e, nia dehan aloka ba saláriu vensimentu $ 12,732,444, bens servisu $ 7,883,020, kapitál menór rihun $ 143,535, transferénsia públika rihun $ 28,775, enkuantu kapitál dezenvolvimentu laiha.

“OJE ne’e nia totál mak millaun $ 20-resin ne’e sura hotu hosi DOT (Dotasaun Orsamentu Temporariu) ne’ebé ita uza hotu ona ne’e mak tau hamutuk millaun $ 20 ne’e, nia restu mak iha fulan rua ba oin ne’e ami sei ezekuta,” dehan Governante hafoin halo audiénsia ho Komisaun B  Parlamentu Nasion ne’ebé trata asuntu Negósiu Estranjeiru, Defeza no Seguransa iha PN, kuarta ne’e.

Husi janeiru to’o loron 22 fulan-setembru ne’e, nia parte ezekuta ona osan pursentu 70 tanba ne’e falta de’it millaun neen maka sei iha hodi ezekuta ba saláriu vensimentu no kapitál menór ba fulan outobru to’o dezembru.

Notísia Relevante :MNEK prevee millaun $ 7-resin selu dividas

Jornalista: Hortencio Sanchez

Editór :Agapito dos Santos

HAKEREK NO HATÁN

Please enter your comment!
Please enter your name here