Ministra Negósiu Estranjeiru no Kooperasaun (MNEK), Adalgiza Albertina Xavier Reis Magno. Imajen/Egas Cristovão

DILI, setembru 2020 (TATOLI)-Ministériu Negósiu Estranjeiru no Kooperasaun (MNEK), iha tinan 2020 ne’e redús orsamentu ba item viajen estranjeiru nian tanba pandemia globál COVID-19.

Ministra Negósiu Estranjeiru no Kooperasaun (MNEK), Adalzija Magno, relata tuir proposta antes ne’e, MNEK propoin millaun $ 26-resin ba tetu fiskál 2020, maibé agora tenki redúz ba millaun $ 20,787,774.

Husi totál millaun $ 20-resin ne’e, nia dehan aloka ba saláriu vensimentu $ 12,732,444, bens servisu $ 7,883,020, kapitál menór rihun $ 143,535, transferénsia públika rihun $ 28,775, enkuantu kapitál dezenvolvimentu laiha.

“OJE ne’e nia totál mak millaun $ 20-resin ne’e sura hotu hosi DOT (Dotasaun Orsamentu Temporariu) ne’ebé ita uza hotu ona ne’e mak tau hamutuk millaun $ 20 ne’e, nia restu mak iha fulan rua ba oin ne’e ami sei ezekuta,” dehan Governante hafoin halo audiénsia ho Komisaun B  Parlamentu Nasion ne’ebé trata asuntu Negósiu Estranjeiru, Defeza no Seguransa iha PN, kuarta ne’e.

Husi janeiru to’o loron 22 fulan-setembru ne’e, nia parte ezekuta ona osan pursentu 70 tanba ne’e falta de’it millaun neen maka sei iha hodi ezekuta ba saláriu vensimentu no kapitál menór ba fulan outobru to’o dezembru.

“Ohin ami halo audiénsia ho komisaun B Parlamentu Nasionál atu aprezenta ami-nia orsamentu. Ami-nia osan iha millaun 20, normalmente ami-nia osan boot liu ida-ne’e, millaun 26 ba leten tanba situasaun Covid ami la-dun viajen entaun orsamentu ami hatún tiha,” nia tenik tan.

Iha sorin seluk, Prezidente komisaun B, José Agustinho Sequeira Somotxo, hateten komisuaun la tau kestaun ba proposta OJE 2020 ne’ebé maka MNEK aprenzenta tanba iha duni nesesidade atu ezekuta ba planu no programa ne’ebé maka iha.

”Ami la tau preokupasaun tanba ita foin sai hosi situasaun duodésimu, tan ne’e foin hakat ba ezekusaun normál. Entaun, orsamentu ne’ebé sira aprezenta ne’e normál sufisiente para bele taka ba despeza no servisu sira ne’ebé pendente hela,” nia katak.

Jornalista:Hortencio Sanchez

Editór : Agapito dos Santos

HAKEREK NO HATÁN

Please enter your comment!
Please enter your name here