Ekipa KOICA-KIDC hasai foto hamutuk ho estudante no profesor ESTV, Becora.Imajen/KOICA-KIDC.

DILI, 27 setembru 2020 (TATOLI)-KOICA-KIDC iha Timor-Leste, iha loron 25 fulan-setembru ne’e fó ona apoiu ekipamentu prevensaun COVID-19 ba Eskola Sekundáriu Tékniku Vokasionál (ESTV), Becora, faze daruak nian.

Fasilidade hirak ne’e ho kuantidade hanesan máskara purvolta 2000, sabaun fase liman 100, dezeinfektante 100, thermometru eletróniku hamutuk haat, poster no video kona-ba pratika prevensaun surtu COVID-19 ne’ebé maka prepara husi voluntáriu husi nasaun Korea ne’ebé  destakadu iha Timor-Leste.

Notísia Relevante :KOICA-KIDC apoiu fasilidade prevensaun COVID-19 ba FFTL

Manager KOICA-KIDC, Choi Eun Young, hateten apoiu ekipamentu hirak ne’e atu tulun estudante, profesór no Timoroan sira seluk nune’e bele halo prevensaun ba transmisaun surtu coronavirus iha Timor-Leste.

Iha faze daruak nian, KOICA-KIDC sei fó mós apoiu ekipamentu prevensaun COVID-19 ba Federasaun Futeból Timor-Leste, Eskola Ensinu Báziku (EBC-sigla portugés) 30 de Agostu Dili, no Orfanatu Bidau.

“Tuir planu eventu karidade FFTL nian sei hala’o iha Loron 28 fulan-setembru, EBC 30 de Agostu sei hala’o iha loron 2 fulan-outubru no Orfanatu Bidau sei hala’o iha loron 8 fulan-outubru,” Choi Eun Young, informa kestaun ne’e liuhosi komunikadu imprensa ne’ebé TATOLI asesu, domingu (27/09).

KOICA-KIDC halo mós parseiru ho Maluk Timor hodi fó treinamentu ba profesionál sira relasiona ho metódu prevensaun COVID-19.

“Poster no video ne’ebé voluntáriu sira halo ne’e kona-ba oinsá atu uza máskara ho loos, oinsá fase liman, oinsá uza dezinfektante no oinsá ita fani bainhira ita besik ema seluk,” nia dehan.

Entertantu, iha faze dahuluk,  Korea International Cooperation Agency (KOICA)-KIDC apoiu ona ba  Ensinu Báziku Filiál 12 de Outubro, Ensinu Báziku Sentrál 10 de Dezembru no Ensinu Báziku Sentrál  Faról Dili iha fulan kotuk.

Notísia Relevante :KOICA-KIDC Oferese Ekipamentu Prevensaun COVID-19 ba EBS Faról

Jornalista:Hortencio Sanchez

Editór :Agapito dos Santos

HAKEREK NO HATÁN

Please enter your comment!
Please enter your name here