Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (23/09). Imajen Tatoli/Egas Cristovão

DILI, 23 setembru 2020 (TATOLI)-Liuhosi reuniaun ordinária Konsellu Ministru (KM), Ministru Koordenadór Asuntu Ekonómiku, Joaquim Amaral, aprezenta projetu dekretu-lei ne’ebé hetan aprovasaun kona-ba medida apoiu ba família sira liuhosi atribuisaun cesta bázika.

Ministru Prezidénsia Konsellu Ministru, Fidelis Manuel Leite Magalhães, hateten dekretu-lei ne’e define mós entidade sira ne’ebé atu apoia Ministériu Koordenadór Asuntu Ekonómiku (MKAE) implementa programa ne’e iha novembru no dezembru 2020.

“Produtór agríkola no operadór komersiál ba produtu alimentár no ijiene pesoál, nasionál no lokál sira sei partisipa iha programa ne’e ho objetivu atu estimula ekonomia iha kurtu prazu no fó insentivu ba produsaun no komérsiu iha ámbitu planu rekuperasaun ekonómika,” tenik Ministru Fidelis, hafoin reuniaun ezekutivu iha Palásiu Governu, kuarta ne’e.

Notísia Relevante: Rekuperasaun ekonómika: SEKoop orienta jerente kooperativa na’in-218 identifika produtu

MKAE halibur ministériu relevante identifika produtu ba programa cesta bázika

Projetu dekretu-Lei ne’e hatuur mós mekanizmu no kondisaun ba implementasaun medida no kria rejime espesiál ba aprovizionamentu iha ámbitu atribuisaun cesta bázika nian.

Benefisiáriu ba programa ne’e maka ema hirak ne’ebé nu’udar agregadu familiár no inskreve ona iha “Livru Rejistu Uma Kain” ne’ebé hela iha territóriu nasionál tomak iha momentu ne’ebé hala’o distribuisaun ba programa ne’e.

“Sidadaun timor-oan sira ne’ebé agora tama hela iha instituisaun sosio edukativa, relijioza, sanitária sira ka ema ne’ebé tama hela iha komarka sei simu ketak no la inklui iha sira-nia uma-kain,” nia akresenta.

Montante fiksa ona ba membru idaidak hosi agregadu familiár sei hetan $25, kada fulan iha fulan-rua nia laran no bele troka ho folin sasán ne’ebé korresponde ba valór osan.

Portavós VIII Governu ne’e konsidera, medida ne’e bele tulun família atu sustenta nesesidade bázika, nune’e bele kontribui problema hamlaha no vulnerabilidade ne’ebé eziste iha rejiaun balun territóriu Timór, ne’ebé ki’ak no izoladu liu no iha fatin hanesan bele kontribui atu hadi’a kondisaun nutrisionál família ne’ebé hetan impaktu negativu tanba menus rendimentu.

Apoiu ne’e ho objetivu atu estimula dinámika ekonómika lokál liuhosi sirkulasaun rekursu finanseiru ne’ebé presiza tebes atu hasa’e produsaun nasionál, nune’e, bele hamenus impaktu krize ekonómika tanba pandemia.

“Iha ámbitu planu rekuperasaun ekonómika, kria kondisaun sira atu aumenta agrikultór, produtór agríkola einjerál no komersiante lokál sira-nia rendimentu ho objetivu atu insentiva mós oferta lokál hodi garante distribuisaun ba produtu sira,” nia subliña.

Governu sei implementa medida haat ho kustu totál millaun $113,4, ba kurtu prazu hanaran mitigasaun impaktu ekonómiku no sosiál ba krize COVID-19, ho objetivu esensiál atu haree ba postu traballu ezistente antes krize no rekupera rendimentu família liuhosi hadi’a empregu no apoiu direitu sidadaun no empreza iha merkadu inklui normaliza hikas atividade ekonómika.

Hosi medida haat ne’e, inklui hotu ho cesta bázika ba família, ho totál kustu ba implementasaun hamutuk millaun $71,5 (valór bele iha mudansa) ho objetivu atu fó apoiu ba nesesidade bázika família, kombate hamlaha ba família vulnerável liu, apoiu ba agrikultór, produtór no komersiante lokál.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here