Ministru Koordenadór Asuntu Ekonómiku, Joaquim Amaral. Imajen Tatoli/Egas Cristovão

DILI, 09 setembru 2020 (TATOLI)-Ministériu Koordenadór Asuntu Ekonómiku (MKAE) daudaun ne’e halibur ministériu relevante sira hodi hahú identifika produtu ba implementasaun programa Rekuperasaun Ekonomiku ba cesta bázika iha novembru no dezembru 2020.

 Ministru Koordenadór Asuntu Ekonómiku, Joaquim Amaral, hateten MKAE halo hela preprasaun ho ministériu relevante sira hanesan Ministériu Turizmu, Komérsiu no Indústria (MTKI), Sekretaria Estadu Kooperativa (SEKoop), Sentru Lojíztika Nasionál (CLN, sigla portugés) no instituisaun seluk ne’ebé daudaun ne’e  iha hela faze diskusaun.

“Ami identifika ona produtu sira no sei mai hotu hosi produsaun lokál,” tenik Ministru Joaquim iha Palásiu Governu, kuarta ne’e.

Notísia Relevante: SEKoop garante produtu grupu kooperativa sufisiente hatan ba cesta bázika

MTKI orienta grupu UNARCO identifika produtu prepara ba cesta bázika

Ministru dehan, hanesan ministériu implementadór ba programa cesta bázika, MKAE sei esforsu hodi aselera lalais preparasaun implementa programa.

“Produtu sira ne’ebé sei utiliza ba programa ne’e mak produtu ne’ebé bele rai kleur hanesan modo tahan, foos, fehuk, no seluk tan tanba haree produtu sira ne’e bele kontein mós kalori no proteina,” nia akresenta.

Tuir Governante ne’e, MKAE dezeña hela implementasaun programa cesta bázika no seidauk iha desizaun finál.

Ba kurtu prazu hanaran mitigasaun impaktu ekonómiku no sosiál ba krize COVID-19, Governu sei implementa medida haat ho kustu totál millaun $113,4, ho objetivu esensiál atu haree ba postu traballu ezistente antes krize no rekupera rendimentu família liuhosi hadi’a empregu no apoiu direitu sidadaun no empreza iha merkadu inklui normaliza hikas atividade ekonómika.

Hosi medida haat ne’e, inklui hotu ho cesta bázika ba família, ho totál kustu millaun $71,5 (valór bele iha mudansa) ho objetivu atu fó apoiu ba nesesidade bázika família, kombate hamlaha ba família vulnerável liu, apoiu ba agrikultór, produtór no komersiante lokál.

Apoiu ne’e sei entrega ho forma voucher, kompozisaun ai-han ijiene no moos ho baze per kapita dimensaun família ho preferénsia produtu nasionál iha merkadu lokál.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here