Membru kooperativa sira halibur malu atu rona orientasaun hosi Sekretáriu Estadu Kooperativa, Elizário Ferreira, hodi kontribui ba rekuperasaun ekonómika, iha Fundasaun Hanai Malu, Bairro Pité, sábadu (29/08). Imajen Tatoli/Natalino Costa

DILI, 29 agostu 2020 (TATOLI)-Sekretáriu Estadu Kooperativa (SEKoop), Elizário Ferreira, konvoka enkontru ho jerente kooperativa sira hodi fó orientasaun jerál hahú identifika produtu kooperativa atubele kontribui ba rekuperasaun ekonómika.

Primeiru, objetivu prinsipál hosi reuniaun ho prezidente kooperativa na’in-218 atu  konsolida hanoin ba serbisu kooperativa atubele la’o ba oin, segundu identifika produtu membru ne’ebé hola parte iha kooperativa hodi bele oferese ba merkadu no kontribui ba kooperasaun ekonómika, terseiru halo diskusaun polítika kooperativa atu kontribu ba rai-ne’e,” dehan Sekretariu Estadu, Elizário Ferreira hafoin enkontru ho membru kooperativa, iha Fundasaun Hanai Malu, Bairro Pité, sábadu ne’e.

Goverante ne’e dehan, liuhosi reuniaun ne’e  produtu kooperativa ne’ebé identifika ona maka hare, sorghum, koto, fehuk ropa, lis no produsaun ortikultura sira seluk.

“Seidauk hatene tonelada másimu loloos, maibé ein prinsípiu ninia kuantidade boot no bele kontribui ba rekuperasaun ekonómika,” nia akresenta.

Tuir Sekretáriu Estadu ne’e, SEKoop hola parte iha serbisu Ministériu Koodenadór Asuntu Ekonómika (MKAE) hodi implementa programa rekuperasaun ekonómika, tanba ne’e kolabora hamutuk kooperativa sira atu sosa produtu no mobiliza ba fatin lojíztiku, hafoin sei distribui filafali ba populasaun, atu nune’e populasaun sira bele konsumu produtu lokál.

“Orientasaun hosi parte SEKoop maka organiza ema atu hatene membru kooperativa  hotu ninia produsaun. Nune’e hamutuk ho Governu hala’o atividade rekuperasaun ekonómika hodi kontribui ba melloramentu ekonomia rai-laran,” nia realsa.

SEKoop promove no organiza ema reforsa no kondisiona atu kooperativa funsiona, nune’e bele prodús hodi oferese ba merkadu, tanba ne’e organiza no akompaña produsaun hodi oferese filafali ba populasaun ne’ebé maka laiha nesesidade.

“Produtu ne’ebe maka Movimentu Kampones Timor-Leste (MOKATIL) prodús hanesan batar Kay Rala ka sorghum, hanesan parte produsaun rai-laran ne’ebé mobiliza hodi oferese ba merkadu, liuliu kontribui ba planu rekuperasaun ekonómika,  hanesan cesta bázika”, dehan SEKOOP Elizario.

Iha biban hanesan, Prezidente Kooperativa Lakon Nakukun Mosu Naroman (LANAMONA), Domingas dos Santos, konsidera reuniaun ne’e importante atu membru kooperativa sira bele kontribui ba rekuperasaun ekonómika.

“Ami hanesan Kooperativa Uniaun Kréditu ho membru sira maioria agrikultór, tanba ne’e ami identifika produtu balun liuhosi kooperativa atubele kontribui ekonomia rai-laran,” tenik Jerente kooperativa ne’e.

Nia dehan, LANAMONA  sei enkoraja membru sira atu prepara produtu kooperativa ne’ebé daudaun sira prodús.

“Ami seidauk hatene membru sira prodús produtu ho kuantidade hira, maibé ami sei fa’an produtu ne’ebé prodús ona atu kontribui ba rekuperasaun ekonómika, liuliu ba produtu hanesan foremungu, foos-batar no produtu ortikultura seluk,” nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here