Governu aprezenta ona rezultadu ezekusaun Dotasaun Orsamentu Temporáriu (DOT) no Fundu COVID-19 ba PN. Imajen/Media PN.

DILI, 22 setembru 2020 (TATOLI)—Tuir ajenda, aban, Komisaun Espesializada Permanente (KEP) sira iha Parlamentu Nasionál hahú hala’o audiénsia públika ho Governu kona-ba proposta Orsamentu Jerál Estadu (OJE) 2020.

Notísia Relevante: Governu define setór tolu iha proposta OJE 2020

Audiénsia públika ne’e hahú hosi 23 setembru to’o 25 setembru 2020. Kalendáriu audiénsia públika ne’e aprovadu hosi Prezidente Komisaun Espesializada sira hahú hosi Komisaun A to’o Komisaun G.

Audiénsia públika ba loron tersa, 23 setembru 2020 ne’e hahú hosi Gabinete Primeiru-Ministru (GPM) ne’ebé akompaña hosi Centro Nacional CHEGA, I.P, Centro Integrado de Gestão de Crises, Gabinete Apoiu Sosiedade Sivíl, Inspesaun Jerál Estadu, Konsellu Interministriál Reforma Fiskál no UPMA.

Iha loron 23 setembru ne’e mós KEP hala’o audiénsia públika ho Prezidénsia Repúblika, Tribunál, Ministru Asuntu Parlamentár no Komunikasaun Sosiál, Ministru Estadu Prezidénsia Konsellu Ministru, Ministériu Justisa, Defensória Públika no PCIC, Ministériu Negósiu Estranjeiru no Kooperasaun (MNEK, Ministériu Agrikultura no Peska (MAP), Banku Sentrál Timor-Leste (BCTL), Sekretaria Estadu Formasaun Profesionál no Empregu (SEFPOPE), RAEOA-ZESSM, Ministériu Finansa (MF), Ministériu Saúde (SAMES, INS, Laboratóriu Nasionál no HNGV).

Entretantu, iha loron 24 setembru 2020, audiénsia ne’e kontinua ho Ministériu Administrasaun Estatal (MAE), INAP, CNE, PDHJ, PJR, CAC, KFP, Ministériu Interiór, Sekretaria Estadu Protesaun Sivíl, PNTL, Ministériu Planu no Ordenamentu, Ministériu Obra Públika, Ministériu Transporte no Komunikasaun.

Iha loron 24 setembru ne’e mós KFP hala’o audiénsia públika ho Ministériu Koordenadór Asuntu Ekonómiku (MEKAE) (Sentru Nasionál Formasaun Profesionál Becora, Sentru Nasionál Formasaun no Empregu Tibar, INDIMO, IJT, SERVE, IADE, Tradeinvest, AIFAESA), Ministériu Solidariedade Sosiál no Inkluzaun (MSSI), INSS, Komisaun Nasionál HIV/SIDA, Sentru Nasionál Reabilitasaun.

Iha loron 25 setembru 2020, audiénsia públika ne’e komposta hosi Ministériu Defeza (F-FDTL no IDN), Ministériu Petróleu no Minerál (IPG, ANPM no Timor Gap), Embaixadór Uniaun Europeia, Sekretaria Estadu Kooperativa, Sekretaria Estadu Ambiente no Seketaria Estadu ba Igualdade no Inkluzaun.

Tanba ne’e, iha loron 1 no 2 outubru 2020, Parlamentu Nasionál hala’o diskusaun no votasaun iha faze jeneralidade, loron 5 outubru to’o loron 8 outubru hala’o diskusaun no votasaun iha faze espesialidade no tama kedas ba votasaun finál globál.

Iha loron 28 setembru 2020, Komisaun Espesializada Permanente sira halo apresiasaun no aprovasaun relatóriu no pareser setoriál OJE 2020 no submete ba Komisaun C.

Komisaun C (Finansa Públika) sei aprova redasaun finál ba dekretu Parlamentu Nasionál nian iha loron 9 fulan-outubru. Iha loron 9 outubru 2020 lokraik Parlamentu Nasionál haruka ba Prezidente Repúblika halo promulgasaun.

Proposta OJE 2020 hamutuk biliaun $1.97,1 komposta hosi saláriu no vensimentu millaun $206,7, bens no servisu millaun $499,3, transferénsia públika millaun $568,7, kapitál menór millaun $8,9 no kapitál dezenvolvimentu millaun $213,4.

Prezidente Parlamentu Nasionál, Aniceto Guterres Longuinhos Lopes, fó-sai iha semana kotuk katak proposta ne’e Governu aprezenta atu debate ho karáter urjénsia entaun Komisaun sira oras ne’e finaliza kalendáriu audiénsia.

“Iha dia 08 outubru, Parlamentu Nasionál tenke aprova ona proposta OJE 2020 hafoin envia ba Prezidente Repúblika,” Aniceto Guterres hateten.

Komisaun Espesializada Permanente (KEP) sira iha Parlamentu Nasionál kompostu hosi Komisaun A (Justisa no Konstitusionál), Komisaun B (Negósiu Estranjeiru, Defeza no Seguransa), Komisaun C (Finansa pÚBLIKA), Komisaun D (Ekonomia no Dezenvolvimentu), Komisaun E (Infraestrutura), Komisaun F (Saúde, Seguransa Sosiál  no Igualdade Jéneru) no Komisaun G (Edukasaun, Juventude, Kultura no Sidadania).

Notísia Relevante: Governu define kompozisaun KROP ba OJE 2021

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here