Primeiru-Ministru, Taur Matan Ruak, hamutuk ho ninia membru sira iha Parlamentu Nasionál (PN), iha sesaun plenária hodi debate proposta Orsamentu Jerál Estadu 2020. Imajen/ Egas Cristovão.

DILI, 18 setembru 2020 (TATOLI)—VIII Governu Konstitusionál lideradu Primeiru-Ministru (PM), Taur Matan Ruak, define setór tolu (3) iha Proposta Orsamentu  Jerál Estadu 2020.

“Setór tolu ne’ebé Governu define mak estabilizasaun setór sosiál, estabilizasaun setór ekonómika no reforma pilár impotante sira mak hanesan administrasaun públika, reforma judisiál, reforma fiskál no jestaun finansa públika,”  refere dokumentu proposta OJE 2020 iha livru Jornada Orsamentál (Livru 1), ne’ebé Agência TATOLI asesu hosi portal ofisiál Ministériu Finansa (portal ofisiál Governu nian), sesta ne’e.

Dahuluk, estabilizasaun setór sosiál mak kontinua investe iha setór saúde hodi fornese serbisu saúde ne’ebé iha kualidade no partikularmente atu responde ba surtu COVID‐19, kria oportunidade ensinu no formasaun ne’ebé kualidade no inkluziva, ne’ebé bele responde ba nesesidade ekonómika.

Iha estabilizasaun setór sosiál ne’e mós hadi’a infrastrutura bee-moos no saneamentu hodi garantia kualidade moris, saúde no prevensaun ba moras.

Hosi estabilizasaun setór sosiál ne’e prevee 31.9% hodi aloka ba ministériu ka ajénsia sira-ne’ebé liga ho setór kapitál sosiál ne’e, 7% ba edukasaun, 14% ba protesaun sosiál no 10% ba saúde.

Iha área refere prevé ba fundu COVID‐19 hodi responde ba saúde hamutuk millaun $80.4, SAMES hodi sosa aimoruk millaun $5.5, alokasaun ba Ministériu Obra Públika ba bee-moos no saneamentu millaun $3.0, alokasaun ba Ministériu Obra Publika hodi halo dezeñu planu mestre ba bee-moos no saneamentu millaun $10.0, alokasaun ba Ministériu Edukasaun, Juventude no Desportu hodi suporta eskola públika, privada no CAFE hamutuk millaun $4.0.

Daruak, iha estabilizasaun setór ekonómika, atu fasilita investimentu setór privadu no fó prioridade ba empreza kiik no media, kria oportunidade serbisu atu hasa’e produtividade nasionál no oportunidade ba ema hotu.

Iha estabilizasaun ekonomia ne’e hasa’e produtividade agrikultura no seguransa ai-haan liuhosi promove no kria infraestrutura foun, kanál distribuisaun no armazeinamentu produtu agríkola.

Iha estabilizasaun ekonomia ne’e mós diversifika ekonomia no hasa’e taxa kresimentu ne’ebé inkluziva no sustentável bazeia ba prioridade Governu nian.

Iha estabilizasaun setór ekonomia ne’e prevé 51% hodi ba setor ekonómika, 27.5% ba dezenvolvimentu ekonómika no 23.3% ba dezenvolvimentu infraestrutura.

Iha setór refere alokasaun iha Fundu COVID‐19 hodi responde ba serbisu saúde no rekuperasaun ekonómika millaun $139.8, alokasaun ba Ministeriu Turizmu, Komérsiu no Indústria ba faze preparasaun no instalasaun Expo Dubai hamutuk $200,000, aloka ba SEFOPE ba programa auto-empregu no Sekretariu Estadu Kooperativa hodi suporta grupu kooperativa sira millaun $1.3.

Datoluk, iha reforma ba pilár importante sira hanesan hadi’a setór administrasaun públika, reforma ekonómika, reforma judisiária, eforma fiskal no jestaun finansa públika.

Iha área ida-ne’e aloka millaun $3.8 ba Ministériu Justisa ba serbisu kadastrál, pasaporte no billete identidade, aloka $730,000 hodi  selu funsionáriu públiku ne’ebé hetan promosaun grau.

Proposta ne’e rasik, hahú segunda-feira semana oin, hahú hala’o audiénsia públika entre ministériu relevante no komisaun espesializada permanente sira iha Palamentu Nasionál.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here