Ministru Prezidénsia Konsellu Ministru, Fidelis Manuel Leite Magalhães. Imajen Tatoli/Egas Cristovão

DILI, 18 setembru 2020 (TATOLI)-Governu liuhosi reuniaun Konsellu Ministru (KM) estraordinária aprova ona projetu rezolusaun Governu, ne’ebé aprezenta hosi Ministru Finansa, Fernando Hanjam, kona-ba definisaun kompozisaun Komité Revizaun Orsamentu Polítiku  (KROP) ba Orsamentu Jerál Estadu (OJE) tinan 2021.

“Kabe ba KROP atu verifika alokasaun estratéjika rekursu submisaun orsamentál nian atubele atinje kompromisu no objetivu ne’ebé konsta iha dokumentu estratéjiku sira no hodi analiza kapasidade ezekusaun ba planu sira iha tinan finanseiru 2021,” relata Ministru Prezidénsia Konsellu Ministru, Fidelis Manuel Leite Magalhães, hafoin reuniaun KM estraórdinaria iha Palásiu Governu, sesta ne’e.

Nia esplika, Komité ne’e sei prezide hosi Primeiru-Ministru (PM), Taur Matan Ruak, no kompostu hosi Vise Primeiru-Ministru na’in-rua, Ministru Koordenadór Asuntu Ekonómiku, Ministru Finansa no Sekretária Estadu Igualdade no Inkluzaun ne’ebé sai hanesan observadora.

KROP sei fahe ba sub-komité setoriál haat, sub-komité setór institusionál prezide hosi Primeiru-Ministru, sub-komité setór sosiál prezide hosi Vise Primeiru-Ministru no Ministra Solidaridade Sosia no Inkluzaun, sub-komité setór infraestrutura prezide hosi Vise Primeiru-Ministru no Ministru Planu no Ordenamentu no sub-komité setór ekonómiku prezide hosi Ministru Koordenadór Asuntu Ekonómiku.

“Sub-komité sira ne’e sei halo analize ba submisaun orsamentál setoriál sira ho simultánea no sei hahú iha loron 21 setembru, hafoin halo analiza ba konkluzaun setór hotu hosi Komité Revizaun Orsamentu Polítiku,” Fidelis esplika.

Aleinde ne’e, KM mós aprova kalendáriu ba KROP ne’ebé sei hahú iha segunda (21/09) maibé to’o iha kuarta (23/09) sei iha pauza tanba iha loron 23 to’o 25 setembru membru Governu sira tenke ba Parlamentu Nasionál hasoru malu ho komisaun.

Iha sábadu no domingu ba oin maka hahú hikas KROP no durante realiza KROP iha loron sábadu no domingu mós kontinua no oráriu hahú tuku sia dadeer no ramata tuku ualu kalan.

Enkuantu, OJE 2021 iha tetu agregadu ho valór biliaun $1,6 ne’ebé aprova ona iha reuniaun ezekutivu loron 02 setembru 2020 no tenke aprezenta ba PN iha loron 15 outubru.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here