Mate isin too iha aeroportu Internasional Nicolao Lobato.Imajen/TATOLI

DILI, 21 setembru 2020 (TATOLI)-Mate-isin Timoroan Na’in rua, Maria Helena Gonzalves Jerónimo no Justino Xavier, segunda ne’e to’o ona iha Dili ho Aviaun Euro Atlantico ne’ebé tula hamutuk ho pasajeiru Estudante Timoroan no sidadaun estranjeiru hamutuk ema na’in 195.

Mate-isin na’in rua ne’e, ida mate iha Inglatera no na’in ida mate iha Portugal.

Notísia Relevante :Euro Atlantico tula pasajeiru 195 fila mai TL

Roberto Seixas Miranda Jerónimo, kaben husi matebian Maria Helena Goncalves Jerónimo, informa matebian mate ho idade 70 tanba sofre kurasaun hafoin sai husi Timor-Leste hodi ba halo tratamentu iha Portugal iha tinan 1998.

“Iha loron 5 novembru 1998 matebian halo operasaun dahuluk depois operasaun daruak hala’o iha 21 abríl 2018 husi rezultadu operasaun sira ne’e la lori rezultadu di’ak. tan ne’e iha 17 agostu 2020 matebian hakotu nia I’is,” dehan nia ba Tatoli, iha Aeroportu Comoro Dili, segunda ne’e.

Matebian nia oan na’in haat ho nia kaben maka akompaña mate-isin to’o iha Dili ohin.

No mate-isin daudaun ne’e sei rai kalan ida iha Ai-mutin Dili,  depois sei kontinua lori ba Munisípiu Baucau Vila Flamboyan Bahu hodi halo’ot.

Iha parte seluk mate-isin Justino Xavier, sei lori bá Ira-Ara Lospalos Vila hodi halo serimonia funebre tuir lisan Munisípiu Lautem nian.

Estevão da Costa nu’udar família konta tuir katak matebian mate iha Inglatera iha 23, fulan- agostu 2020 tanba sofre moras pulmaun.

Matebian sai husi Timor-Leste hodi bá servisu iha Inglatera iha tinan 2014 liubá. Matebian alin husi Saudozu Renan Selak.

“Matebian Justino Xavier alin husi matebian Renan Selak taka ninia peregrinasaun iha mundu ne’e ho idade 43,” dehan nia.

Durante moras, matebian halo ona tratamentu saúde iha ospitál Inglatera kuaze tinan tolu maibé la konsege rekupera.

Notísia Relevante :Iha posiblidade Aviaun Euro Atlantico mak sei tula Timoroan fila mai TL

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here