Governu aprezenta ona rezultadu ezekusaun Dotasaun Orsamentu Temporáriu (DOT) no Fundu COVID-19 ba PN. Imajen/Media PN.

DILI, 21 setembru 2020 (TATOLI)—Governu liuhosi Ministériu Finansa, ohin, aprezenta ona rezultadu ezekusaun Dotasaun Orsamentu Temporáriu (DOT) no Fundu COVID-19 ba Parlamentu Nasionál.

Notísia Relevante: Ezekusaun fundu COVID-19 atinje ona porsentu 55,6, korresponde millaun $122

Iha aprezentasaun relatóriu ezekuasaun DOT no Fundu COVID-19 ne’e reprezenta hosi Governu mak hanesan Ministru Finansa Fernando Hanjam, Ministru Asuntu Parlamentár no Komunikasaun Sosiál Francisco Jerónimo, Ministra Saúde Odete Maria Freitas Belo, Ministra Negósiu Estranjeiru no Kooperasaun Adaljiza Magno no Vise-Ministra Finansa Sara Lobo Brites.

“Ami mai esplika kona-ba Dotasaun Orsamentál Temporáriu (DOT) durante períodu rejime duodesimál no ezekusaun fundu COVID-19 iha tinan finanseiru 2020. Iha ámbitu ezekusaun DOT, ita hotu hatene katak OJE seidauk vigora iha inisiu tinan finanseiru ida, Governu iha obrigasaun polítika no legál rekorre ba DOT hodi asegura funsionamentu instituisaun estadu nian,”  Ministru Finansa, Fernando Hanjam, esplika liuhosi plenária Parlamentu Nasionál, segunda ne’e.

Nia hateten, DOT ba depeza to’o ka menus hosi fulan ida no pagamentu respetiva despeza labele ultrapasa fundu hosi tetu orsamentu tinan anteriór nian, konforme prevee iha artigu 31 Lei Orsamentu no Jestaun Finanseiru nian.

Nia dehan, ho baze ba enkuadramentu ida-ne’e no hola referénsia ba OJE 2019 nian, Governu kada fulan fixa montante duodésimu ho valór iguál ka menus hosi millaun $123.5 hodi asegura pagamentu ba despeza sira rezultadu obrigasaun legál no kontatuál sira, ne’ebé estadu asume durante períodu rejime duodesimál.

“Ho ida-ne’e totál alokasaun DOT ba períodu entre loron 01 fulan-janeiru to’o loron 31 fulan-agostu 2020 ho valór millaun $954.5, ne’ebé distribui ba serbisu estrativa finanseira ka liña ministerial sira, órgaun autónoma sein reseita propria no serbisu fundu autónoma sira,” nia dehan.

Hosi millaun $954.5 ne’e, tuir nia, Governu ezekuta ona millaun $479.3 durante respetiva períodu iha nível klasifikasaun ekonómika ka kategoria orsamentál sira hanesan saláriu no vensimentu millaun $123.6, millaun $151.3 ba bens no servisu, millaun $2.2 ba kapitál menór.

Nune’e mós millaun $70.5 ba ba transferénsia públiku no millaun $120.8 ba kapitál dezenvolvimentu, despeza sira urjénsia imprevistu ne’ebé rezulta hosi fundu rezerva kontijénsia ho valór millaun $10.6.

“Hosi despeza refere hetan finansiamentu hosi reseita doméstika ho valór millaun $117.4,” nia hateten.

Parlamentu Nasionál, nia haktuir, autoriza Governu halo transferénsia estraordinária hosi fundu petróleu ho valór millaun $316.8 no utilizasaun saldo tezouru ho valór millaun $ 234.2.

Ho nune’e despeza atuál hosi janeiru to’o agostu 2020 ho valór millaun $479.3 no reseita totál ka finansiamentu ba respetiva despeza no valór millaun $648.4 durante respetivu períodu rejime duodesimál.

Iha parte seluk, Ministru Finansa ne’e fó-sai katak ezekuasaun orsamentu iha ámbitu fundu COVID-19 nian millaun $219.5 no doasaun hosi International Labour Organization (ILO) ho valór millaun $0.55, ne’ebé destina ba despeza sira relasiona ho medida prevensaun no kombate surtu COVID-19 nian.

Totál orsamentu hosi fundu COVID-19 ho valór millaun $220.2, ne’ebé distribui ka aloka ba programa tolu hanesan millaun $198.3 aloka ba programa prevensaun no mitigasaun COVID-19 ne’ebé ezekuta ona millaun $103.6, millaun $5 aloka ba programa aumenta sustentabilidade produsaun no produtividade ne’ebé ezekuta ona millaun $1.

Nune’e mós millaun $17 aloka ba programa asesu produtu alimentár no naun-alimentár, ne’ebé ezekuta ona millaun $16.5.

“Totál reál orsamentu fundu COVID-19 nian ba programa tolu refere ho valór millaun $121.1 no resta hanesan balansu to’o 31 fulan-agostu ho valór millaun $80.5 ne’ebé Governu iha ona komitmentu millaun $14.5 no obrigasaun millaun $3.9 no sei balansu disponivel millaun $80.5,” Fernando Hanjam hateten.

“COVID-19 seidauk ramata, tan ne’e ho balansu ne’ebé sei disponivel Governu sei haka’as-aan nafatin produs no ezekuta medida sira nesesáriu hodi prevene no kombate surtu ne’e,” Ministru Finansa ne’e promete.

Notísia Relevante: Governu ezekuta ona fundu COVID-19 millaun $100-Resin

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here