Primeiru-Ministru, Taur Matan Ruak. Imajen Tatoli/Egas Cristovão

DILI, 27 agostu 2020 (TATOLI)-Primeiru Ministru (PM), Taur Matan Ruak, informa ezekusaun fundu COVID-19 hamutuk millaun $100-resin.

“Ita gasta millaun $100-resin ona, liuliu ba sosa ekipamentu, foos no halo rekuperasaun ba infraestutura saúde, transporte no komunikasaun inkui fó subsídiu ba inan-aman sira no subsídiu uma-kain, sira ne’e hola parte iha fundu COVID-19 nian” tenik PM Taur hafoin enkontru semanál ho Xefe Estadu iha Palásiu Prezidensiál, Bairro Pité, kinta ne’e.

Xefe Governu dehan, orsamentu atu finansia pakote rekuperasaun ekonómika hamutuk millaun $142.

“Aleinde gastu sira ne’e, Governu mós finansia buat seluk tanba antes ne’e ita husu uluk millaun $150, hafoin ita husu tan pakote daruak nian ho montante millaun $70-resin, entaun hamutuk millaun $220 resin,” nia akresenta.

Notísia Relevante: Ezekusaun Fundu COVID-19 Atinje Ona Porsentu 64

Governu husu tranférensia estraordináriu dahuluk ba fundu mina-rai hamutuk millaun $150 no hetan autorizasaun husi Parlamentu Nasionál no Prezidente Repúblika promulga no pedidu tranferénsia daruak ho montante millaun $250.

Iha loron 28 abríl 2020, Sekretariadu Téknika Konsellu Jestaun fundu COVID-19 halo notifikasaun ba ministériu no inistituisaun implementadór hamutuk 13 hodi hahú ezekuta no implementa fundu COVID-19.

Pakote rekuperasaun ekonómika hamutuk iha medida neen no asaun hamutuk 19 ne’ebé sei implementa to’o agora.

Programa dahuluk maka prevensaun no metigasaun COVID-19 ho ninia montante orsamentu hamutuk millaun $125,9, husi verba ne’e sei finansia sub-programa hamutuk 10, progaram daruak mak aumenta produsaun no produtividade ho ninia alokasaun hamutuk millaun $4.9 no programa datoluk maka asesu produtu alimentár iha alimentasaun servisu ho ninia alokasaun orsamentu hamutuk millaun $19,1.

Alokasaun orsamentu ba Gabinete Primeiru-Ministru hamutuk millaun $1,6, Sekretáriu Estadu Komunikasaun Sosiál (SEKOMS) hamutuk $207.000, Ministériu Agrikultura no Peska (MAP) millaun $4,9,  Ministériu Negósiu Estranjeiru no Kooperasaun (MNEK) millaun $2,4, Ministériu Finansa (MF) $900.000, Ministériu Saúde (MS) millaun $52,4, Ministériu Solidariedade Sosiál no Inkluzaun (MSSI) millaun $15.

Enkuantu, Ministériu Turizmu, Komérsiu no Industria (MTKI) millaun $6, FALINTIL-Forsa Defeza Timor-Leste (F-FDTL) millaun $12,5, Polísia Nasionál Timor-Leste (PNTL) $670.000, Centru Logistika Nasionál (CLN, sigla portugés) hamutuk millaun $19,1, Sentru Integradu Jestaun Krize (CIGC,sigla portugés) millaun $34,5 hanesan fundu rezerva.

Iha medida subsídiu ba eletrisidade no bee-moos ne’ebé implementa ona, ninia asaun mak fó $15 ba kada kliente Eletricidade de Timor-Leste (EDTL) ba kada fulan durante fulan-rua inklui subsídiu fulan-rua ba bee-moos, ne’ebé alokasaun ba eletrisidade millaun $7,686 no ba bee-moos ho totál orsamentu millaun $4,2.

Pagamentu subsídiu ba uma-kain ne’ebé implementa ona, ho proposta inisiál hamutuk millaun $15 maibé hafoin iha aumentu dadus uma-kainmaka montante sa’e ba millaun $65,556.

To’o jullu besik 2.000 traballadór mak hetan ona benefísiu hosi medida subsídiu porsentu 60 ba traballadór, ne’ebé maka 293 hosi 1993 maka motorista iha setór transporte no pagamentu ne’ebé Institutu Nasionál Seguransa Sosiál (INSS) halo ona ho montante $656.176, ne’ebé antes ne’e aloka orsamentu millaun $14,188.

Medida seluk mak apoia subsídiu ba estudante timor-oan naun bolseiru iha rai-li’ur, ne’ebé tuir dadus ne’ebé mak simu antes ne’e iha estudante naun bolseiru 3.488, ho fundu orijinál millaun $2,404, maibé hafoin ajusta ninia fundu atuál $3.273.696, ne’ebé gastu tiha ona hamutuk millaun $1,343, ne’ebé kompila ba persentajen hamutuk porsentu 41,5.

Medida transporte no konetividade iha subsídiu ba aviaun Dili-Darwin tuir proposta ne’ebé Governu hato’o $585.000, maibé hafoin alterasaun no halo ajustamentu, ninia fundu sa’e ba millaun $1,673 no konsege gasta ona millaun $1,118.

Aviaun semo bá-mai hamutuk dala 30, pasajeiru hamutuk 71 no sasán ne’ebé tula ho kuantidade kilograma 11.085.

Ba distribuisaun sasán, CLN halo proposta akizisauna foos hosi Vietname, ne’ebé ho fundu orijinál ho valór $18.216.815, maibé hafoin hetan invoice no finaliza prosesu hamutuk valór millaun $17,35, ho gastu totál millaun $16,500, ne’ebé korresponde gastu totál ho porsentu 86,9.

Medida kona-ba garantia produsaun agrikultura no peska, ne’ebé daudaun implementa hela, ninia orsamentu orijinál millaun $4,952, maibé hafoin halo rekonsiliasaun sai millaun $2,437, ne’ebé gasta tiha ona millaun $1,793, korresponde ho porsentu 73,6.

Komponente kréditu ba pagamentu ba sira ne’ebé maka foti osan hosi banku sira, proposta inisiál millaun $8,182 sai millaun $5.

Inklui medida seluk tan ne’ebé sei iha prosesu nia laran atu implementa.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here