Ministru Ensinu Superiór, Siénsia no Kultura, Longuinhos dos Santos. Imajen/Egas Cristovão

DILI, 16 setembru 2020 (TATOLI)-Governu liuhosi Ministériu Ensinu Superiór Siénsia no Kultura, Ministériu Negósiu Estranjeiru no Kooperasaun (MNEK), no Ministériu Finansa, daudaun ne’e halo hela koordenasaun servisu atu fasilita billete aviaun ba Timoroan ne’ebé maka hakarak fila mai Timor-Leste durante pandemia globál COVID-19.

“Ita nia sidadaun Timoroan sira liliu ita-nia estudante sira ne’ebé mak finaliza ona sira-nia estudu iha rai-liur hasoru difikuldade ho transportasaun tanba ne’e ita husi Ministériu tolu mak kolabora ona atu apoiu hodi lori fila sira mai Timor-Leste,” informa Ministru Ensinu Superiór Siénsia no Kultura (MESSK), Longuinhos dos Santos, ba jornalista sira iha Palacio do Governo Dili, kuarta ne’e.

Notísia Relevante :Governu Kontratu Citilink Lori Fila Timoroan iha Korea Súl

Ministériu tolu ne’e idaidak hahú halo ninia servisu, husi parte MESSK nian oras ne’e identifika ona estudante hamutuk ema na’in 159 maka hakarak fila mai TL. Enkuantu husi parte MNEK nian maka buka meius atu aluga aviaun, no Ministériu Finansa maka apoiu orsamentu.

“Asuntu ne’e foin mak iha faze preparasaun kuandu finaliza hotu ona mak foin bele deside data fiksu atu lori sidadaun Timoroan sira fila mai Timor-Leste,” tenik Governante.

Entretantu, iha loron 05 fulan-agostu liubá Governu aluga aviaun Citilink husi Indonézia hodi lori fila traballadór Timoroan iha Korea Súl tanba vistu mate ona, no estudante hamutuk ema na’in 110  inklui mate isin, Carlito Ferreira no  Gabriel Ribeiro.

Matebian Carlito Ferreira, nu’udar traballadór Timoroan hodi servisu iha Korea Súl no Gabriel Ribeiro, servisu iha Inglatera, sira na’in rua mate durante implementasaun Estadu Emerjénsia liga ho COVID-19 iha fulan hirak liubá.

Governu liuhusi Sekretáriu Estadu Formasaun Profesionál no Empregu (SEFOPE) maka aloka osan purvolta $ 94.000 hodi aluga aviaun Citilink lori fila Timoroan sira ne’e mai iha TL iha fulan kotuk.

Notísia Relevante :Mate-isin Timoroan na’in rua to’o ona TL

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here