Pasajeiru Aviaun Citilink bainhira to’o iha Aeroportu Prezidente Nicolau Lobato, Comoro, Dili. Imajen Tatoli/António Gonçalves

DILI, 21 jullu 2020 (TATOLI)-Governu daudaun ne’e kontrata ona aviaun Citilink husi Indonézia hodi lori fila traballadór Timoroan no estudante hamutuk 160 iha Korea Súl no nasaun seluk tan mai Timor-Leste iha loron 30 fulan jullu ne’e, tanba sira-nia vistu servisu mate kleur ona.

Aleinde tula traballadór hirak ne’e, aviaun ne’e mós hetan kontratu husi Governu hodi tula mate-isin traballadór, Carlito Ferreira, ne’ebé maka hakotu ona iis iha Nasaun Korea Súl iha semana hirak kotuk lori mai rai-laran.

Notísia Relevante :Governu Deside Ona Lori Fila Mate-Isin Timoroan iha Korea

“Ita kontrata ona Citilink mak atu tula fila ita-nia traballadór sira iha Korea Súl hamutuk ho mate-isin traballadór iha Korea ne’e iha 30 jullu agora,”informa Diretór Nasionál Asuntu  Konsulár no Komunidade Timoroan, Ministériu Negósiu Estranjeiru no Kooperasaun (MNEK), Erminio da Silva Pinto, ba jornalista sira iha edifisiu MNEK Praia dos Coqeirus Dili, tersa ne’e.

“Aviaun ne’e sei tula mós estudante balun husi Estadus Unidus Amerika, Thailandia no seluk tan hamutuk ema na’in 160 mak sei mai ho aviaun ne’e,” nia esplika.

Kona-ba orsamentu hira maka Governu gasta hodi selu aviaun komersiál husi nasaun viziñu ne’e, Diretór ne’e lakohi komenta ba jornalista sira.

Notísia Relevante :Governu Sei Aluga Aviaun Tula Traballadór Timoroan iha Korea Súl

Entretantu, antes ne’e, Sekretáriu Estadu Formasaun Profisionál no Empregu (SEFOPE), prevee ona osan hamutuk $ 94.000 hodi aluga aviaun hodilori fila traballadór Timoroan sira ne’ebé maka vistu servisu mate ona iha Austrália no Korea Súl.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here