Xefe Estadu Maiór Jenerál F-FDTL, Majór Jenerál Lere Anan Timur. Imajen Tatoli/Antonio Goncalves

DILI, 16 setembru 2020 (TATOLI)-Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, iha ona informasaun kona-ba ema balun iha fronteira terrestre mak fasilita membru grupu arte marsiál Persaudaraan Setia Hati Terate (PSHT) ba sa’e sabuk (pengesahan) iha Atambua, Indonézia.

Notísia Relevante : Operasaun konjunta detein tan membru PSHT na’in-23

Jenerál Lere preokupa movimentu ilegál (tama-sai) iha liña fronteira terrestre Timor-Leste ho Indonézia, tanba bele kontribui lori transmisaun peste letál Coronavirus ka COVID-19 mai Timor-Leste tanba propagasaun COVID-19 iha nasaun viziñu Indonézia maka’as tebes.

Atu evita surtu COVID-19 mai Timor-Leste, Jenerál Lere Anan Timur, propoin atu estabelese medida forte no rigorozu atu labele admite ema liuhusi dalan illegal fronteira terrestre nian.

 “Ita preokupa tanba hakat husi fronteira illegal mak barak, foin lalais, ita kestiona ida ne’e ema ruma mak fasilita sira bele atravesa  tanba sira sai husi ne’e la deteta foin fila mak deteta tanba sira ba atinje ona sira ona objetivu sa’e sabuk. Ida-ne’e presiza halo investigasaun ida,” afirma Jenerál Lere Anan Timur ba jornalista, hafoin hala’o enkontru regular ho Prezidente Repúblika, Francisco Guterres ‘’Lu-Olo’’, ohin,  iha Palásiu Prezidente, Dili.

Notísia Relevante : UPF, EUP ho F-FDTL detein membru PSHT na’in-43

Jenerál Lere promete sei ho  Komandante Jerál PNTL, Komisáriu  Faustino da Costa, ho Vise Ministru Interior atu aprezenta nia preokupasaun ne’e no oinsá halo prevensaun ida di’ak no rigor.

Lere hateten, Governu tenke hola medida forte hodi halo kontrola másimu hodi evita sirkulasaun illegal hodi halo prevensaun ba transmisaun COVID-19.

Durante enkontru ho PR Lú Olo,  Jenerál Lere informa mós situasaun rai-laran no situasaun forsa armada ninian ne’ebé la’o di’ak no forsa armada kontinua hala’o nia  misaun iha fronteira no iha fatin seluk ne’ebé forsa sira kolokadu ba.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here