Portavós PNTL, Superintendente Xefe Arnaldo de Araújo. Imajen Tatoli/Eugénio Pereira

DILI, 09 setembru 2020 (TATOLI)– Liuhusi Operasaun Konjunta Unidade Patrullamentu Fronteira (UPF), Unidade Espesiál Polísia (UEP)   Munisípiu Bobonaro ho FALINTIL-Forsa Defeza Timor-Leste (F-FDTL), detein membru organizasaun arte marsiál husi Persaudaraan Setia Hati Terrate (PSHT) na’in-43 iha liña fronteira terrestre.

Notísia Relevante : UPF ho F-FDTL kaptura negosiante balun iha fronteira terrestre

Komandante PNTL Munisípiu Bobonaro, Superintendente Xefe Octávio de Araújo Bucar, informa, ema hirak ne’e autoridade detein dezde iha  loron 5 too 9 setembru 2020

“Dezde loron 5 to’o ohin , ami detein ema na’in 43 kompostu husi feto na’in-hitu  no mane na’in 36 ne’ebé identifika nu’udar membru organizasaun arte marsiál PSHT ne’ebé ilegálmente haku’ur liu fronteira terrestre hodi ba sa’e sabuk (pengesahan) iha Atambua-Indonézia,”  konfirma Komandante Octávio  de Araújo ba jornalista via telefone.

Membru arte marsiál hirak ne’e mai husi Munisípiu Baucau, Viqueque, Dili, Bobonaro, Suai no munisípiu seluk tan.

Iha sorin seluk, portavós PNTL, Superintendente Xefe Arnaldo de Araújo afirma mós katak membru PSHT sira ne’e ekipa konjunta detein no halo apreensaun ba sira nia atributu hanesan farda, sintu no seluk tan, hafoin tama ilegál ba Atambua- Indonézia ba sa’e sabuk no fila fali mai Timor-Leste maka autoridade sira kaptura.

Liuhusi konferénsia imprensa iha Komandu Jerál PNTL, Caicoli, Dili, Superintendente Xefe Arnaldo de Araújo, informa tan,  hafoin kaptura ema hirak ne’e, ekipa koordena kedas ho ekipa COVID-19 Ministériu Saúde hodi halo teste ba sira-nia kondisaun saúde hodi  submete ba konfinamentu obrigatóriu ka kuarentena iha Batugade.

Hafoin ema hirak ne’e kumpre tiha regra saúde iha kuarentena, ekipa saúde sei entrega fali ba Komandu PNTL Bobonaro hodi halo investigasaun kle’an no aprezenta ba Ministériu Públiku.

Iha parte seluk, UPF mós detein mós sidadaun Timoroan na’in-lima (5) nu’udar negosiante Rejiaun Administrativu Espesiál Oe-Cusse Ambenu (RAEOA) ne’ebé halo atividade tranzasaun sasán nesesidade báziku ilegál.

“Ita nia forsa sira kaptura mós ita nia negosiante Oé-Cusse nain lima ne’ebé halo tranzasaun sasán ilegál hanesan, kombustivel, tua no sasán báziku seluk tan,” nia hateten.

Portavós PNTL ne’e rekoñese ema hirak ne’e tama ilegál ba Atambua-Indonézia liu husi dala ilegál  iha tempu kalan boot no parte seguransa sira la konsege deteta sira nia paradeiru too fila foin kaptura.

“Ita nia fronteira ne’e luan tebes, tanba ne’e ema sira ne’e sempre buka oportunidade para tama ilegál, maibé ita nia polísia sira servisu maka’as nafatin hodi halo prevensaun liuhusi kaptura sira para ita evita moras COVID-19 ne’e,” Arnaldo hateten.

Komandu operasaun konjunta sei kontinua halo operasaun hodi implementa regra Estadu Emerjénsia (EE) dalimak hodi evita abitante nasaun rua halo atividade ilegál iha liña fronteira terrestre no tasi laran.

Jornalista   : Eugénio Pereira

Editór            : Francisco Simões

HAKEREK NO HATÁN

Please enter your comment!
Please enter your name here