Logotipu PSHT.

DILI, 14 setembru 2020 (TATOLI)- Operasaun konjunta Unidade Patrullamentu Fronteira (UPF), Unidade Espesiál Polísia (UEP) no FALINTIL-Forsa Defeza Timor-Leste (F-FDTL) detein tan membru arte marsiál  Persaudaraan Setia Hati Terate (PSHT) na’in-23.

Notísia Relevante : UPF, EUP ho F-FDTL detein membru PSHT na’in-43

Ema na’in-23 ne’e forsa konjunta kaer iha kalan-boot iha área fronteira Terrestre Batugade na’in-16 no na’in-hitu (7) iha área fronteira Munisípiu Covalima.

Ema hirak ne’e halo viajen ilegál husi Timor-Leste ba Atambua-Indonézia, hafoin partisipa serimónia sa’e sabuk (pengesahan).

Portavós PNTL, Superintendente Xefe Arnaldo de Araújo. Imajen Tatoli/Eugénio Pereira

“Ita nia UPF, F-FDTL no UEP iha Batugade konsege kaptura ema na’in-16 ne’ebé ba tuir ezame sa’e sabuk iha Indonézia no ema na’in-hitu UPF kaptura iha postu Covalima nian,” informa portavós PNTL, Superintendente Xefe, Arnaldo de Araújo ba jornalista liuhosi konferénsia imprensa, ohin, iha Komandu Jerál PNTL, Caicoli, Dili.

Membru PSHT hirak ne’e parte seguransa entrega ona ba ekipa COVID-19 Ministériu Saúde hodi teste ba sira nia kondisaun saúde no hela obrigatóriu iha kuarentena Batugade no Covalima kumpre tiha loron 14 sei halo investigasaun ba ema hirak ne’e hodi prosesa kazu ba Ministériu Públiku.

“Ema sira ne’e agora iha hela kuarentena Batugade, no PNTL halo mós halo apreensaun ba atributu sira entrega ona ba PNTL Bobonaro no Covalima, sira kumpre tiha kuarentena, sira nia kazu sei aprezenta ba Ministériu Públiku,” nia hateten.

PNTL Dili mós detein oknum membru PSHT feto-ida ne’ebé ba hala’o atividade sa’e sabuk iha Atambua no fila ilegál mai subar iha Dili.

“Ita bolu mós señora ida ne’ebé ba sa’e sabuk iha Atambua tama mai ilegál, ita ba kaer iha uma haruka ba hela iha kuarentena para evita COVID-19,” nia informa.

Daudaun ne’e, ekipa konjunta kontinua halo patrullamentu iha liña fronteira hodi kontrola sidadaun sira labele halo movimentu ba mai.

Notísia Relevante : Prezidente PSHT TL husu membru sira tama kuarentena obrigatóriu

Jornalista   : Eugénio Pereira

Editór        : Francisco Simões 

HAKEREK NO HATÁN

Please enter your comment!
Please enter your name here