Osan Dolar Amerikanu. Imajen/Espesiál

DILI, 14 setembru 2020 (TATOLI)-Sekretáriu Estadu Juventude no Desportu (SEJD), Abrão Saldanha, hateten nia parte simu ona pakote Orsamentu Jerál Estadu (OGE-sigla portugés) 2020 nian husi Ministériu Finansa hamutuk millaun $ 7.7.

Sekretáriu Estadu Juventude no Desportu, Abrão Saldanha. Imajen/SEJD

“Orsamentu dadauk ne’e SEJD simu pakote millaun $ 7.7 ne’e fahe ba diresaun sira iha SEJD nia laran, prioridade husi orsamentu ne’e iha área desportu mak investe iha desportu iha rai-laran,” dehan Governante ba Tatoli iha edifísiu SEJD Lecidere, segunda (14/09).

Notísia Relevante :Programa Prioridade SEJD 2020 Tau-matan ba Juventude

Husi orsamentu ne’e halo redúsaun maka’as ba item viajén estranjeiru hodi investe maka’as iha rai laran. Tanba tuir planu tinan 2020 no 2021 SEJD sei halo festival nasionál desportu ba modalidade hotu-hotu.

“Jogu eskolár iha nivel munisípiu no jogu sira iha nivel postu administrativu. Ida seluk mós mak investe iha rekursu umanu setór desportiva nian liliu árbitru, treinadór sira no seluk tan,” nia esplika.

Iha área joventude, nia dehan sei aloka orsamentu hodi reabilita Sentru Joventude “Prioridade ida seluk mak fortalese organizasaun sira juventude nian hodi promove kreatividade juventude sira, ida ne’e hotu mak agora ita tau hela osan, tinan oin mós ita sei iha festival joven kriadór sira koloka mós atividade oioin iha laran,” dehan Abrão.

Enkuantu, iha área infraestrutura SEJD seidauk simu pakote kona-ba kapitál dezenvolvimentu, nune’e  maka SEJD seidauk iha planu atu hari’i infraestrutura.

“Ami halo ezersisiu semana rua ona,  karik iha solusaun no hetan osan ruma karik atu halo manutensaun ba kampu balun, maibé ezersisiu tetu ba orsamentál ne’e lá hanesan ho osan tinan kotuk Millaun $ 8-resin  no agora hatun ba millaun $ 7-resin, entaun ita sei halo hela ezersisiu ba ida ne’e,” hateten Sekretáriu Estadu.

Notísia Relevante :Redusaun Orsamentu ba SEJD La Fó Impaktu ba Atividade Desportu

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here