Sekretáriu Estadu Juventude no Desportu, Nélio Isaac Sarmento. Imajen/Tatoli

DILI, 26 setembru 2019 (TATOLI) – Sekretáriu Estadu Juventude no Desportu, Nélio Isaac Sarmento, hateten programa prioridade hosi Sekretaria Estadu Juventude no Desportu (SEJD) ba 2020 sei kria kondisaun di’ak ba juventude hotu iha área rurál.

“Kria kondisaun ba joven sira mak hanesan liuhosi ajudu ne’ebé Governu fó ba sira bele benefísia ekonomia iha grupu joven sira. Mobiliza sira atu bele mobiliza-aan tanba ita hotu hatene katak ita mós tau osan iha grupu Konsellu Polísiamentu Komunitáriu. Hanoin ida ne’e bele mobiliza di’ak liután ita-nia joven sira,” tenik Nélio iha Paláçio do Governo, kinta ne’e.

Nia haktuir, atu implementa programa refere mak sira nia parte hala’o soru-mutuk ho Primeiru-Ministru nune’e bele troka ideia para bele realiza programa hirak ne’e iha tinan oin.

“Ohin ami ho Primeiru-Ministru iha ona konkordánsia ida katak ami preparadu atu halo esplikasaun detallu ida ba komunidade ho orsamentu foun ne’ebé mak ami tau ona hodi responde ba preokupasaun povu ninian liliu suku sira iha área rurál,” nia haktuir.

Nia esplika, hosi apoiu ne’ebé Governu sei haraik ba juventude hotu fiar katak sira sei proteje-aan no oinsá bele kuidadu mós ambiente iha suku ida-idak ho orsamentu ne’ebé Governu sei distribui.

“Apoiu ne’e ba suku hotu-hotu maibé laós fó dala ida de’it ba suku hotu. Fazeadamente. Ita hahú hosi munisípiu sira ne’ebé mak ita sei identifika iha poténsia atu hetan uluk oportunidade ida ne’e,” dehan governante ne’e.

Aleinde ne’e, nia esplika mós kona-ba orsamentu ne’ebé mak aloka ba Sekretaria Estadu Arte no Kultura (SEAK) no Sekretaria Estadu Igualdade Jéneru no Inkluzaun (SEJI) ne’ebé sei implementa mós iha 2020.

“Atu informa katak, ohin, loloos Sekretáriu Estadu tolu mak hasoru Primeiru-Ministru maibé ha’u ho de’it Sekretáriu Estadu Arte no Kultura tanba Sekretária Estadu Igualdade Jéneru okupadu hela. Entaun, orsamentu ba Sekretaria Estadu Arte no Kultura nian oinsá mak apoiu ba grupu kulturál iha suku sira,” nia haktuir.

Nia subliña, apoiu iha área kulturál  haree liubá patrimóniu kulturál sira hanesan uma adat no seluk-tan.

Enkuantu, orsamentu ba SEJI sei apoiu liubá grupu feto sira iha área rurál oinsá bele jere osan ne’ebé Governu fó atu jere sira-nia aan.

Totál orsamentu ne’ebé sei prevee ba Sekretaria Estadu tolu ne’e, kada Sekretaria Estadu sei hetan millaun $1.5.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here