Sekretáriu Estadu Juventude no Desportu, Nélio Isaac Sarmento. Imajen/Tatoli Egas Cristovao

DILI, 07 janeiru 2020 (TATOLI)–Sekretáriu Estadu Juventude no Desportu, Nélio Isaac Sarmento, hateten maski Orsamentu Jerál Estadu (OJE) ne’ebé aloka ba Sekretaria Estadu Juventude no Desportu (SEJD) hetan redusaun maibé la fó impaktu ba atividade desportu durante 2020.

“Orsamentu ami-nian ko’a ne’e kuaze la fó impaktu ba atividade desportu hotu iha 2020. Atividade sira-ne’e aseguradu la’o nafatin. Agora nia impaktu ne’e mak klube sira no ema sira partisipa iha Liga hanesan futeból, basketból, voleiból no modalidade seluk tan mak sei la hetan subsídiu. Ida-ne’e mak impaktu,” Nélio tenik iha Parlamentu Nasionál, tersa ne’e.

Nia dehan, orsamentu ne’ebé atu aloka na SEJD hamutuk millaun $9.7 maibé orsamentu refere lori ba Parlamentu Nasionál no haruka fila ba Governu redús tiha millaun 3 no daudaun ne’e SEJD hela de’it millaun $6 resin.

“Kuandu ami iha Komisaun Revizaun ami preokupa hela ho Kapitál Dezenvolvimentu tanba hodi asegura fatin sira ne’ebé atu prepara ba jogu CPLP nian entaun ami husu osan ne’e labele redús. Tan ne’e, sira aumenta fali osan iha Kapitál Dezenvolvimentu nian hodi halo hela reabilitasaun ba Jináziu Dili no Voleiból Praia nian. Nune’e, konsege hasa’e fali orsamentu ba millaun  $7.1,” Nélio haktuir.

Nia esplika osan kuaze millaun rua resin ne’ebé redús barak liu iha transferénsia públika no viajen lokál balun.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here