INFORDEPE.

DILI, 10 setembru 2020 (TATOLI)- Institutu Nasionál Formasaun Dosente no Profisionál Edukasaun Timor-Leste (INFORDEPE), hahú fulan-janeiru to’o agostu 2020 ne’e konsege oferese ona formasaun lian jestuál ba profesór hamutuk ema na’in 300-resin ne’ebé hala’o iha Munisípiu Dili, Ermera, Mantuto, Liquiça, Aileu, Bobonaro no Baucau.

Vise Prezidente Gabinete Formasaun Profesór no Kontinua (GFPK), Arlindo Pinto, hateten formasaun lian jestuál ne’e atu prepara profesór sira nune’e bele hanorin labarik ho kondisaun defisiénsia sira bainhira involve sira iha edukasaun inkluziva.

Notísia Relevante :INFORDEPE Oferese Formasaun Língua Portugeza Nivel A1 Ba Profesór Sira

“Ita tau mós prioridade ba formasaun lian jestuál ne’e atu bele prodúz profesór sira ne’ebé iha kapasidade no koñesimentu atu lori ita-nia maluk sira ne’ebé mak iha problema ho tilun atu sira bele komprende no hatene kona-ba informasaun sira ne’ebé mak espalla iha mundu espesiál iha Timor-Leste,” dehan nia ba jornalista sira iha INFORDEPE Matadouro, kinta ne’e.

Programa formasaun ne’e akontese tanba INFORDEPE halo kooperasaun ho Parseiru Internasionál hodi oferese formadór husi eskola internsionál lian jestuál.

“Ita seidauk iha profesór espesializadu iha área lian jestuál ne’e entaun ita hahú kooperasaun hodi husu formadór internasionál husi  eskola internasionál lian jestuál mak apoiu formasaun ba profesór sira iha nivel edukasaun pre-eskolár no ensinu báziku,”tenik tan.

Entretantu, iha semana kotuk liubá hahú husi loron 01 to’o 07 fulan-setembru formasaun lian jestuál ba profesór sira ne’e Postu Administrativu Atauro Dili.

Notísia Relevante :INFORDEFE hahú rekruta Dosente Timoroan 106

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here