DILI, 19 agostu 2020 (TATOLI)-Institutu Nasionál Formasaun Dosente no Profisionál Edukasaun Timor-Leste (INFORDEPE) iha loron 18 fulan-agostu ne’e loke ona vaga hodi rekruta Dosente Timoroan hamutuk 106  para fó apoiu ba Projetu Pro-Portugés ne’ebé sei implementa iha territóriu Timor-Leste.

Prosesu rekrutamentu ne’e hahú ona iha loron 18 fulan-agostu no sei ramata iha loron 31 fulan ne’e.

Koordenadór Projetu Pro-Portugés, Mariano Tavares, hateten kandidatu Dosente sira ne’e sei hili husi Munisípiu 12 inklu Rejiaun Administrativa Espesiál Oé-Cusse Ambeno (RAEOA) ho grau akadémiku minimu baxarelatu iha Língua Portugés.

Husi totál dosente rekrutadu ne’e sei fahe ba kada Munisípiu hanesan Aileu dosente na’in neen, Ainaro na’in neen, Baucau 12, Bobonaro 12, Covalima 12, Dili ualu, Ermera na’in ualu, Lautem na’in ualu, Liquiça na’in haat, Manatuto 10, Manufahi na’in neen, RAEOA na’in neen no Viqueque na’in ualu.

“Dosente sira ne’e kuandu liu ona prosesu hotu, sira sei tuir fali formasaun durante oras 360 mazumenus fulan-tolu. Semana ida sira sei tuir formasaun iha kapitál depois mak sei loke tan formasaun ba sira iha kada Munisípiu,” dehan nia ba Tatoli iha INFORDEPE, kuarta ne’e.

Tuir planu dosente rekrutadu hirak ne’e sei sai formadór ba Projetu Pro-Portugés. Husi númeru ne’e fahe ba formadór suplente na’in 53 no efetivu na’in 53.

“Formadór  Timoroan sira ne’e sei hetan formasaun husi Profesór Português ne’ebé agora fó apoiu ba edukasaun iha Timor-Leste,” katak nia.

Nia dehan hafoin formasaun, dosente Timoroan hirak ne’e sei destaka bá iha Postu Administrativu no Munisípiu hodi implementa projetu ne’e.

Munisípiu Aileu Postu sei destaka dosente iha Postu Administrativu Laulara, Likidoe no Remexio. Ainaro iha Postu Administrativu Hatubeliku, Hatudu no Maubisse.

Iha Munisípiu Baucau sei destaka bá iha Vemase, Laga, Kelikai, Baguia, Venilale. Bobonaro sei destaka iha Postu Administrativu, Atabae, Balibo, Bobonaro, Cailaco no Lolotoe.

Munisípiu Covalima sei destaka iha Postu Administrativu Zumalai, Maucatar, Tilomar, Fatumea, Fatululi no Fohorem.

Munisípiu  Dili iha  Postu Cristo Rei, Dom Aleixo, Metinaro no Atauru, Munisípiu  Ermera iha Postu Atsabe, Hatulia, Letefoho no Railaco,  Munisípiu Lautem iha Postu Iliomár, Luru no Tutuala.

Munisípiu  Liquiça iha Postu Bazartete no Maubara, Munisípiu Manatuto iha Postu Barique,  Laklo, Laklubar , Laleia no Soibada. Munisípiu Manufahi  iha Postu Fatuberliu, Alas no Turiscai, RAEOA  iha Postu Nitibe , Oesilo no Pasabe, Munisípiu Viqueque iha Postu Uatulari, Ossu, Uatucarbau no Lacluta.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here