Diretór INFORDEPE, Efrem Edemundo Soares Ximenes Belo. Foto: Joanico de Araújo

BAUCAU, 24 setembru 2019 (TATOLI)—Diretór Instituto Nacional de Formação de Docentes e Profissionais da Educação (INFORDEPE), Efrem Edemundo Soares Ximenes Belo, informa daudaun ne’e sira halo formasaun ba profesór sira kona-ba língua Portugeza Nivel A1.

Formasaun ne’e kontinuasaun husi formasaun língua portugeza nivel A1 ne’ebé  hala’o de’it ba iha munisípiu tolu mak hanesan Baucau, Lautem no Viqueque.

“Iha Baucau iha kuatru turmas ho ninia totál ne’e iha 126 profesór. Iha Lautem mós iha sentru haat no quatro turmas depois nia totál 118 profesór. Iha Viqueque iha cinco turmas hamutuk 120 profesór. Totál hamutuk 477 profesór,” dehan Diretór INFORDEPE, Efrem Edemundo Soares Ximenes Belo, ba Ajénsia TATOLI liuhusi entrevista iha nia knaar fatin, Baucau Vila Nova, tersa (24/9/2019).

Formasaun língua portugeza Nivel A1 ida  ne’e, nia hatutan, foin konklui iha nivel A1 maibé sira-nia esperansa atu to’o iha Nivél B. Entaun, nia dehan, tinan tuir mai programa Governu  nian  ne’e sira fó nivél A2 depois tama iha  nivel B1 no tama iha B2 no ikus liu to’o iha  nivel C.

“Hafoin ida ne’e, ami sei halo formasaun profesór réjime kontratu. Ida ne’e, iha Timór tomak ne’e, iha 2000 resin profesór. Iha Baucau ne’e iha profesór ema 500 resin tanba ida ne’e mai sei aponta hela atu kontinuasaun ho nivel B1,” nia dehan.

Diretór ne’e haktuir, iha tinan 2018 sira halo ona formasaun língua portugeza A1 iha fatin haat Baucau, Lautem, Manatuto no Viqueque. Iha Baucau sira halo iha fatin lima ho cinco turma ho totál profesór hamutuk 191, iha Lautem turma ida ho totál profesór hamutuk 21, iha Manatuto três turma ho totál profesór hamutuk 78, iha Viqueque três turmas ho total profesór hamutuk 107 ne’ebé totál formandu hamutuk 395.

“Iha tinan 2017, ita bolu formasaun língua portuguesa A1 sei kontinua nafatin tanba númeru ne’e boot no formasaun iha tinan tolu nia laran. Formasaun ne’e ami hala’o iha munisípiu tolu de’it seidauk kobre Manatuto. Munisípiu Baucau iha 3 turmas hamutuk 95 profesór, Lautem iha duas turmas hamutuk 55 profesór, Viqueque iha três turmas hamutuk 82 profesór. Totál profesór hamutuk 232,” nia esplika.

Entretantu, nia informa, iha tinan 2016 mós iha formasaun ba profesór sira husi Ensinu Báziku ne’e iha turma 10 no profesór sira ne’ebé tuir formasaun ne’e hamtuk 123.

Jornalista: Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here