Ministru Turizmu, Komérsiu no Indústria, José Lucas do Carmo, konvoka reuniaun ho grupu UNARCO, iha ninia knaar fatin, foin lalais ne’e. Imajen/Mídia-MTKI

DILI, 07 setembru 2020 (TATOLI)-Mininistru Turizmu Komérsiu Industria (MTKI) José Lucas do Carmo, konvoka reuniaun ho grupu Uniaun Agrikultura Covalima (UNARCO), hodi  rona preokupasau no rienta grupu agrikultór sira identifika produtu agrikultura no ortikultura sira iha munisípiu Covalima hodi prepara ba implementasaun cesta bázika.

“Hanesan  Ministru  halo enkotru ho grupu Uniaun Agrikutura Covalima atu fó  hatene ba grupu ne’e katak daudaun Governu atu implementa planu kurtu prazu hanaran cesta bázika, ne’ebé programa ne’e nesesita timor-oan tenke identifika tipu produtu ho ninia kuantidade hodi bele responde ba medida no entidade relevante halibur hotu produtu hodi halo distribuisaun,” tenik Ministru José Lucas ba Agência Tatoli, foin lalais ne’e, iha ninia knaar fatin, Bebora.

Tuir governante ne’e, grupu ne’e rasik prontu kolabora ho Governu liuhosi MTKI atu identifika produtu ne’ebé foti hosi grupu uniaun rasik.

“Cesta bázika sei distribui ba territóriu tomak tanba ne’e presiza hahán ka produtu lokál sira ho kuantidade boot ida, ne’ebé kontribuisaun hosi produtór sira,” nia akresenta.

Notísia Relevante: Rekuperasaun ekonómika: prevee millaun $113,4 ba medida haat kurtu prazu

Nia dehan, presiza dadus loloos atu rekolla hahán no produtu hosi produtór sira ne’ebé atu partisipa distribuisaun.

“Ohin ha’u rekomenda ba grupu sira atu halo diskusaun tékniku liután ho Direktór Jerál sira atubele hatene didi’ak variedade produtu no kuantidade. Ita labele mai ho produtu ho kuntidade kilo 10 ka 12 de’it  tanba cesta bázika rasik produtu tenke ho kuantidade boot ho tipu produtu variavél hodi bele fahe ba populasaun Timór laran tomak,” Ministru subliña.

Governu liuhosi liña ministeriál hahú koordena ho produtór sira atu identifika produtu hodi korresponde ba programa rekuperasaun ekonómika.

“Ohin  ha’u haree sira iha interese, maibé agora depende fali ba kuantidade ho variadade produtu, oinsá sira bele dada-lia ho Diretór Jerál sira tanba Dirijente sira maka hola parte iha ekipa interministeriál atu haree kona-ba kestaun tékniku,” nia esplika.

Grupu UNARCO prontu kobabora ho Governu

Iha fatin hanesan, Prezidente UNARCO, João  Gusmão, hateten grupu agrikultór ne’e rasik prontu kolabora ho Governu atu kontribui ba programa cesta bázika.

“Ha’u hanoin ba kuantidade produsaun ne’ebé ami iha hanesan produsaun foos-rai, batar ho fore-mungu  bele kontribui ba programa Governu,” nia akresenta.

Grupu UNARCO sei halibur hamutuk hodi pasa informasaun

“Iha  postu administrativu Covalima rasik  iha agrikultór UNARCO hamutuk 67 iha zona hitu hanesan iha área Zumalai iha produsaun, Tilomar no Salele rai ida potensiál tebes atubele hetan produsaun di’ak,” nia informa.

Enkuantu iha postu administrativu Fatumea, Fatululik no Maukatar iha produsaun lis-mean, lis-mutin, no koto.

“Maibé durante ne’e agrikutór sira ladún iha motivasaun tanba ladún iha merkadoria no  sai difikuldade ba sira, maibé ami garantia tempu badak bainhira partilla ona informasaun, sira bele responde ba nesesidade Governu,” nia subliña.

Ba kurtu prazu hanaran mitigasaun impaktu ekonómiku no sosiál ba krize COVID-19, Governu sei implementa medida haat ho kustu totál millaun $113,4, ho objetivu esensiál atu haree ba postu traballu ezistente antes krize no rekupera rendimentu família liuhosi hadi’a empregu no apoiu direitu sidadaun no empreza iha merkadu inklui normaliza hikas atividade ekonómika.

Hosi medida haat ne’e, inklui hotu ho cesta bázika ba família, ne’ebé sei implementa iha fulan novembru no dezembru ho totál kustu millaun $71,5 (valór bele iha mudansa), ho objetivu atu fó apoiu ba nesesidade bázika família, kombate hamlaha ba família vulnerável liu, apoiu ba agrikultór, produtór no komersiante lokál.

Apoiu ne’e sei entrega ho forma voucher, kompozisaun ai-han ijiene no moos ho baze per kapita dimensaun família ho preferénsia produtu nasionál iha merkadu lokál.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here