Sekretáriu Estadu Kooperativa, Elizário Ferreira. Imajen Tatoli/Jogerjo Guterres

DILI, 07 setembru 2020 (TATOLI)-Sekretaria Estadu Kooperativa (SEKoop) ho koordenasaun Ministériu Koordenadór Asuntu Ekonómiku (MKAE) ne’ebé hola parte iha implementasaun medida kurtu prazu rekuperasaun ekonómika ba cesta bázika, iha tarefa atu halibur grupu kooperativa atu identifika produtu, atubele oferese ba merkadu no distribui ba populasaun iha territóriu tomak.

Sekretáriu Estadu Kooperativa, Elizário Ferreira, otimista katak produtu lokál hosi kooperativa sira sufisiente atu responde ba medida cesta bázika ne’ebé sei implementa iha novembru no dezembru tinan ne’e.

“Ein prinsípiu, haree ba distribuisaun tanba sei halo ba faze rua, iha novembru no dezembru maka produtu ne’ebé maka iha rai-laran sufisiente hela atu kobre,” tenik Sekretáriu Estadu Elizário Ferreira hafoin relata progresu Serbisu SEKoop ba Primeiru-Ministru, Taur Matan Ruak, iha Palásiu Governu, segunda ne’e.

Notísia Relevante: Rekuperasaun ekonómika: prevee millaun $113,4 ba medida haat kurtu prazu

Tuir governante ne’e, hosi produtu ne’ebé maka identifikadu, iha ona sorghum tonelada 1.800, hare 1.600, koto, fehuk-ropa, no produtu seluk tan.

Nia informa, SEKoop rejista ona grupu kooperativa hamutuk 214 no membru individu 47.000.00 maihosi territóriu Timór.

MKAE nu’udar ministériu implementadór halo ona koordenasaun ho instituisaun relevante sira.

“Dadaun ne’e ministériu sira ne’ebé maka iha MKAE ninia okos halo ona identifikasaun ba armajen sira atu konsentra lojíztiku ba produtu ne’ebé mak iha no halo diskusaun kona-ba prosesu distribuisaun,” akresenta Sekretáriu Estadu ne’e.

Nia dehan, povu tenke benefisia polítika Governu ba rekuperasaun ekonómika, tanba ne’e presiza motiva liután produtór sira hodi bele aumenta produsaun rai-laran hodi kontribui ba Produtu Internu Brutu (PIB).

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here