Logotipu ASEAN. Imajen/Espesiál

DILI, 08 setembru 2020 (TATOLI)-Prezidensia ASEAN ne’ebé daudaun ne’e lidera husi nasaun Vietname fó ona autorizasaun ba Timor-Leste hodi partisipa iha atividade sosiu kultura ASEAN nian ba futuru.

Diretora Jeral asuntu ASEAN Milena Rangel.Imajen/hortencio Sanses

ASEAN foti desizaun ne’e hafoin ekipa tékniku ASEAN nian halo telekonferénsia ho TL kona-ba preparasaun iha pilár sosiu-kultura iha tersa (08/09).

Notísia Relevante :Aban, ASEAN avalia preparasaun TL liuhosi telekonferénsia

Telekonferénsia ne’e hala’o iha edifísiu Ministériu Negósiu Estranjeiru no Kooperasaun (MNEK) Dili. Husi parte TL lidera husi Diretora Jerál ba Asuntu ASEAN, Milena Rangel, no Diretór Jerál, Jorge Camões no husi SOCA ASEAN lidera husi H.T Mintho husi Vietname.

“Antes ne’e atividade Sosiu-Kultural nian importante de’it ba nasaun membru ASEAN de’it maibé agora Timor-Leste mós hetan ona oportunidade atu  partisipa iha atividade sira ne’e,” dehan Diretora Jerál ba Asuntu ASEAN, Milena Rangel ba jornalista sira iha salaun enkontru MNEK, tersa ne’e.

Nia hatete telekonferénsia ne’e hodi estabelese kontaktu entre TL ho ASEAN atu klarifika kestionariu ne’ebé Timor-Leste prienxe ona kona-ba pilár sosiu-kultura iha ne’ebé submete ona ba sekretariadu ASEAN iha Jakarta iha abríl 2020.

“Ida ne’e di’ak tebes ba ita atu koñese malu ho ajénsia sira ne’ebé mak estabelese pilár Sosiu- Kultural iha ASEAN nian laran,” tenik tan.

Entretantu, telekonferénsia ne’e halo durante loron rua hahú iha loron 08 no 10 fulan-setembru 2020.

Notísia Relevante :PR ho MNEK diskute prosesu adezaun TL ba ASEAN

Jornalista  : Tomé Amado

Editór        : Agapito dos Santos

HAKEREK NO HATÁN

Please enter your comment!
Please enter your name here