DILI, 04 setembru 2020 (TATOLI)–Diretór Ezekutivu Centro Nacional Chega (CNC), Hugo Maria Fernandes, hateten komemorasaun masakre setembru negro iha Suai-Covalima sei fó opurtunidade ba sasin-na’in ka vítima sira hodi haktuir sira-nia memória istória pasada ba públiku.
Hugo Fernandes hatutan, vítima sira ne’e enkuadra iha polítika sira ba hakbiit sobrevivente sira ne’ebé mak vulneravél liu mak fó apoiu direta no seluk mak atu halo komemorasaun tanba komemorasaun ne’e nu’udar dalan ne’ebé mak fó opurtunidade ba vítima sira atu ko’alia.
Nia haktuir, komemorasaun ne’e fó opurtunidade ba públiku atu fó rekonesementu ka dignifika vítima, tanba vítima sira la ko’alia iha públika no sira ko’alia de’it iha uma-laran no ba CNC maka ema barak sei la hatene.
“Komemorasaun masakre setembru negro ne’e fó opurtunidade ba públiku atu fó rekonesementu ka dignifika vítima, tanba vítima sira la ko’alia iha públika no sira ko’alia de’it iha uma-laran no ba CNC maka ema barak sei la hatene. Entaun bainhira ita oferese palku no kondisaun di’ak ema barak mak sei rona no hosi ida-ne’e mak ema bele fó onra no dignifika mínimu respeitu sira-nia istória ba partisipasaun no kontribuisaun luta ba ukun rasik-aan,” dehan Hugo Maria Fernandes ba Agência TATOLI, iha nia knaar fatin, Antigu Komarka, Balide, Dili, kuarta (02/09/2020).
Tanba ne’e, Hugo Fernandes hato’o agradese ba estudante Suai-oan sira iha Suai tanba tinan kotuk la konsege maibé ba tinan ne’e realiza komemorasaun ba masakre setembru negro tenke involve sasin no vítima sira hodi bele konta ninia memória pasada nian ba públiku.
Nia dehan, maskí iha situasaun Dotasaun Orsamentu Temporária (DOT) maibé CNC ho Minist’eriu Solidariedade Sosiál no Inkluzaun (MSSI) kontinua koordena malu hodi apoia ba implementasaun programa hakbiit sobrevivente atu kontinua ba tinan 2021, no daudaun ne’e urjemente saida mak atu halo uluk mak hodi buka atu rejistu lalais ba vítima no sobrevivente sira.
Iha Suai, Hugo hateten, Aosiasaun Vítima sira halo ona rejistu no hein katak tinan oin bele ona atribui ba vítima setembru negro Suai ho maskare sira seluk iha Timor-Leste tanba hosi ema hamutuk 400 ne’e balun maihosi Suai no kuaze hosi masakre iha fatin hotu.
“Ita hein de’it bainhira ita tama orsamentu normál mak atribuisaun bele la’o ona,” Hugo Maria Fernandes hateten.
Jornalista: Osória Marques
Editór: Cancio Ximenes
