Diretór Ezekutivu Centro Nacional Chega (CNC), Hugo Maria Fernandes. Imajen/Mídia CNC.

DILI, 17 agostu 2020 (TATOLI)–Diretór Ezekutivu Centro Nacional Chega (CNC), Hugo Maria Fernandes,  hateten rekomendasaun hosi CAVR “Chega!” hamutuk 204 ne’e Governu implementa ona 60% ka 70%.

Notísia Relevante: Rekomendasaun “Chega!” rekomenda ba Governu dignifika FALINTIL sira

“Ita iha duni progressu ba implementasaun rekomendasaun hosi CAVR ‘Chega!’. Hosi CAVR entrega relatoriu ba Prezidenti Republika iha 2005 to’o agora ne’e, Governu implementa ona rekomendasaun balu hosi rekomendasaun 204 ne’e to’o 60% ka 70% ona,” dehan Diretór Ezekutivu Centro Nacional Chega (CNC), Hugo Maria Fernandes, ba Agência TATOLI iha nia knaar fatin Antigu Komarka, Balide, Dili, segunda ne’e.

Hosi rekomendasaun ne’e, Hugo Fernandes informa, programa prioridade ba VIII Governu Konstituisionál nian ne’ebé mak hasai iha 2018 mak prezerva memória pasadu hodi promove rekonsiliasaun hodi servisu hamutuk liña minitsriais hanesan Ministériu Solidaridade Sosiál no Inkluzaun (MSSI), Ministériu Justisa (MJ) ne’ebé mak komesa halo rekomendasaun buka ema lakon no tau-matan ba vítima no tau-matan ba fatin istóriku sira.

“Programa CNC nian ida mak CNC mós halo ona mapamentu ba sítiu istóriku sira hanesan iha tinan rua nia-laran no ita halo progresu mapamentu iha munisípiu neen (6) ona,” nia informa.

Iha tinan ne’e, nia hateten, planu loloos ne’e kompleta programa iha munisípiu sira maibé la konsege hala’o tanba iha problema kuotasaun orsamentál temporária depois iha surtu COVID-19 hodi hamosu estadu emerjénsia no labele halo mobilizasaun ba no mai.

Aleinde ida ne’e, nia haktuir, rekomendasaun ida hosi rekomendasaun “Chega!” ne’e nia laran maka CNC esforsu hodi hatama konteudu relatória CAVR “Chega!” nian ba iha kuríkulu ensinu nian.

Nia hateten, daudaun ne’e CNC iha hela prosesu ba halo avaliasaun impaktu tanba iha tinan tolu (3) ne’e proprama sira ne’ebé mak CNC halo ne’e iha impaktu saida iha komunidade nia leet no impaktu saida ba liña ministeriais no saida mak sira opta ona. 

Entratantu, nia esplika, uluk 2016 seidauk iha nota entedementu ho liña ministeriais maibé agora halo ona nota entendementu ho liña ministeriais barak ona inklui ho organizasaun sosiedade sivíl no universidade sira.

“Ita halo nota entendementu liña ministeriais ho RTTL rasik, CI, INAP, PDHJ, entaun haree hosi ne’e ita iha ona progressu kompara ho tinan 2017,” dehan Hugo.

Nia haktuir, ein peinsipiu hosi tinan 2016 to’o 2017 ne’e laiha implementasaun tanba implementasaun programa prioridade maibé hosi 2018 iha progresu di’ak tanba iha VIII Governu Konstitusionál ne’e opta rekomendasaun sira ne’e tama ba programa prioridade tinan lima nian.

Hosi tinan 2016-2017 ne’e, tur nia, iha rekomendasaun barak mak ita-nia Governu seidauk implementa tanba ita ladún iha kooperasaun no laiha dalan formál ida atu ita hala’o no implementa rekomendasaun hirak ne’e,” nia dehan. 

Iha futuru, nia hateten, CNC kontinua habelar liutan ho liña ministeriais sira seluk tanba durante ne’e koordenasaun la’o atu hatama programa ba ministeriais mak neineik.

Ezemplu, nia dehan, ho Ministériu Saúde ita hakarak MS opta atu oinsa mak fasilita tratamentu saúde ba vítima sira tanba durante ne’e iha tratamentu ba veteranu sira de’it no seidauk iha tratamentu ba vítima sira maibe to’o agora seidauk realiza.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here