Saudozu Mau-Hudo Raan Kadalak (klaran) tuur hamutuk ho Lider Pro-Autonomia, João Tavares, no Fracisco Lopes da Cruz. Imajen/Espesiál.

DILI, 26 agostu 2020 (TATOLI)—Reprezentante Forca Armada Libertação Nacional Timor Leste (FALINTIL) iha Komisi Perdamaian da Stabilitas (KPS) ka Komisaun Pás no Estabilidade (KPS),  Vidal de Jesus “Riak Leman”, informa reprezentante FALINTIL iha KPS asegura implementasaun Konsulta Populár (referendu 1999) iha Sidadade Dili to’o anunsia rezultadu votasaun Konsulta popular iha loron 04 setembru 1999.

Notísia Relevante: Tinan 1999: Rona rádiu “Mau-Hudo” ba Kupang, “Mau-Huno” monu dezmaia

Riak Leman hatutan, iha momentu kruel ne’e, nia konsege fó hanoin ba Saudozu Mau-Hudo Raan Kadalak atu sira na’i-rua (2) sees hosi Dili hodi salva-aan tanba inimigu sira atu oho reprezentante FALINTIL ne’ebé servisu iha Komisi Perdamaian dan Stabilitas (KPS) maibé Mau-Hudo la tau ba konsiderasaun, tanba nia hetan ona kontaktu hosi komandante TNI ida atu ba hasoru Jenerál Wiranto.

“Ho situasaun ne’e, halo reprezentante FALINTIL iha vila laran ne’e aguenta to’o anunsia rezultadu refendu ne’e iha loron 4 setembru 1999. Irmaun Mau-Hudo Raan Kadalak, komandante TNI ida naran Joko kontaktu nia dehan Wiranto mai atu ba hasoru. Entaun Mau-Hudo dehan ba ha’u, ita ba hasoru Jenerál Wiranto. Ha’u dehan lae, agora inimigu atu oho ita mak nia tiru ona ita ne’e. Di’ak liu ita lalika ba hasoru. Ita sees-aan ona. Maibé Mau-Hudo dehan; ‘Se ha’u husik KPS mak Indonézia bele ho razaun ida-ne’e boikota referendu. Ida ne’e estrategiku ikus liu atu salva referendu no asegura estratejia implementa referendu depois povu Timor reafirma ukun rasik aan husi referendu’. Maibé to’o ikus irmaun Mau-Hudo mak ba hasoru ka la hasoru mak ne’e, ba iha-ne’ebá ema kala kaer nia, hodi lori lakon ka oho mate to’o hela agora ne’e,” Riak Leman informa ba Agência TATOLI, iha nia kna’ar-fatin, Matadoru, tersa ne’e.

Entretantu, Riak Leman hateten, antes ne’e bainhira rona juventude independénsia sira oho membru milísia ida iha Becora halo Komando da Luta Kay Rala Xanana Gusmão telefone kedas ba lider juventude indpendentista ida iha Becora hodi buka hatene tanbasá mak kazu oho membru mislísia ne’e akontese.

Nia hatutan, ho asaun ida-ne’e mak lori halo Lider Pro-Autonomia, Eurico Gueterres, raan nakali tanba juventude independentista sira oho ninia membru iha Bairru Becora no konsege karrega kilat ba nia ho Saudozu Mau-Hudo Raan Kadalak maibé la konsege tiru kilat.

“Iha momentu ne’e, ha’u iha hela Komisi Perdamaian dan Stabilitas (KPS) iha tasi-ibun ne’e. Derrepente Eurico Guterres karrega ona kilat atu tiru ami maibé nia la konsege tiru kilat. Iha tempu ne’e, ema barak iha área KPS tasi-ibun ne’e halai namkari. Ha’u ho Saudozu Mau-Hudo mak hamriik hela iha nia oin maibé Eurico Guterers la halo buat ida,” nia haktuir.

Iha biban ne’e, Riak Leman no saudozu Mau-Hudo informa kedas ba komandante milísia Eurico Guterres atu halo konfirmasaun ba lider juventude independentista, João da Silva “Choque”, entaun Riak Leman mós sa’e-tuir Eurico Guterres nia karreta hodi ba observa fatin akontesimentu ne’e.

Iha karreta laran, Riak Leman haktuir, Eurico Guterres kaer hela kilat ida no bainhira tún hosi karreta laran ne’e, Riak Leman dehan onestu ba João Choque katak nia mai hasoru sira-ne’e mai ho Eurico Guterres. Maibé, João Choque simu ho liafuan-kro’at entaun Eurico Guterres fila nia karreta halai fila ba nia fatin, no iha biban Riak Leman hela mesak ho juventude sia nia leet mak Xanana Gusmão telefone kedas João Choque.

“Maun Boot Xanana telefone hosi Cipinang mai liuhosi malae Amerikanu ida. Entaun, malae entrega telefone mai ha’u no husu “sé mak oho Plácido”. Momentu ne’e irmaun João Choque iha hela ha’u-nia sorin dehan lahatene sé mak oho. Maibé, hotu-hotu deskonfia irmaun João Choque sira-nia grupu mak oho, ne’ebé ita-nia alin João Choque mak ne’e hela. Ha’u entrega telefone ba João Choque hodi ko’alia direta ho Maun Boot Xanana. Maun Boot Xanana husu, entaun irmaun João Choque hatán “ami mak oho” lori ba subar hela iha Fatuahi. Entaun, iha dadeersan POLDA (Polisi Daerah) no UNAMET mak ba foti mate-isin,” Riak Leman informa.

Tuir nia, iha momentu ne’ebá, Kay Rala Xanana Gusmão fó kedas orientasaun ba nia hodi ba foti osan Rp.30 juta hodi entrega ba Eurico Guterres atu bele haree no tau matan ba família membru milísia Plácido ninian ne’ebé juventude sira oho ne’e.

“Entaun, ha’u Mau-Hudo ho sira seluk lori osan ne’e ba entrega ba Eurico Guterres iha Komandu Ai-Tarak. Depois ami na’in-hira ne’e akompaña mate-isin ne’e ba hakoi iha Raikotu. Hakoi hotu tiha, ami idak-dak fahe-malu namkari,” Riak Leman hateten.

Prezidente Concelho Nacional Resistencia Timorense (CNRT), Xanana Gusmão, anunsia funu hasoru Estadu Indonézia no Tentara Nasional Indonesia (TNI) iha loron 05 abril 1999 ne’ebé hamosu konflitu entre grupu pro-autonomia no pro-independénsia hodi obriga Estadu Indonézia hala’o esforsu makaas atu hala’o rekonsiliasaun atu garantia estabilidade seguransa hodi harii dame iha Timor-Leste (Timor Timur).

Esforsu hosi Tentara Nasional Indonesia(TNI) no Polisi Republik Indonesia (POLRI) ne’e, atu fasilita akordu dame ne’ebé raliza hosi Dioseze Dili iha loron 21 abril 1999. Hosi sorumutu ne’ebé lidera hosi Menhankam/Panglima TNI Jendral Wiranto, Komnas HAM, no Igreja Katólika hodi deside akordu ida atu harii Komisi Perdamaian dan Stabilitas (KPS) ka Komisaun Pás no Estabilidade ne’ebé hili ninia reprezentante sira hanesan FRETILIN, pro-integrasaun, TNI/POLRI, Komnas HAM, no reprezentante Estadu Indonézia nomós reprezentante UNAMET nian.

Servisu prinsipál sira ne’ebé KPS atu hala’o mak hanesan; (1) monitoriza akontesimentu violasaun direitus umanus ne’ebé afeta ba dame, (2) halo koordensaun ho parte hotu atu hapara intimidasaun no violensia, (3) simu komunidade sira-nia keixa kona-ba violasaun direitus umanus ne’ebé hala’o hosi autoridade seguransa no seluk tan, no  (4) KPS hamutuk ho UNAMET atu halo kodigu konduta (code of conduct) atu regula hahalok aat sira ne’ebé akontese antes no hafoin Konsulta Populár.

Notísia Relevante: Rai-Hún Mutin Sa’e Daudaun Ona..! (XVI)

Jornalista: Evaristo Soares Martins

Editór: Cancio Ximenes

1 KOMENTÁRIU

  1. karik tentara Joko ne`e sei moris, husu tuir tok nia. Lori comandante ne`e ba ne`ebe no hasoru se? mate ona karik hatudu nia rate

HAKEREK NO HATÁN

Please enter your comment!
Please enter your name here