Komandante Mau-Huno (klaran) no Saudozu Mau-Hudo Raan Kadalak tuur hamutuk no konversa ho Komandu Luta Nian, Kay Rala Xanana Gusmão, hodi trasa Timor-Leste nia ukun rasik-aan. Imajen/Espesiál.

Maizumenus tuku 14.00 lorokraik, ami deskansa uitoan iha Kotolau nia okos mai, katuas Mau-Huno loke hela rádiu Olanda hodi rona notísia ne’e fó sai kona-ba saudozu Mau-Hudo Raan Kadalak nia viajen ba Kupang hamutuk ho refujiadu timoroan sira. Rona tiha notísia ne’e, katuas Mau-Huno monu dezmaia kedas iha fatin no la’o la di’ak (iha altura ne’ebá kedas Komandante Mau-Huno komesa moras to’o de’it agora). 

Bainhira katuas Mau-Huno hadeer hikas mai, Mau-Huno tanis hodi dehan, “Hudo, ha’u hateten fila-fila ba ó atu ita-rua sai ona hosi Dili. Maibé ó la rona, destavez, ó kala sai duni vítima ba komandu nia orientasaun”.

DILI, 25 agostu 2020 (TATOLI)—Sitasaun rohan ida iha leten ne’e haksumik aan iha istória naruk kona-ba juventude timoroan ida ne’ebé moris iha presaun iha prosesu Konsulta Populár (referendu) 1999, ne’ebé moris iha milísia Ai-tarak no militár Indonézia nia leet iha bairru Quintal Boot, besik Taman Makam Pahlawan Seroja, Dili.

Notísia Relevante: Xanana Gusmão: “Ita na’in-rua nia diferensa sei hanaruk povu nia sofrimentu”

Iha ámbitu komemorasaun Loron Konsulta Populár ba dala-21 (30 agostu 1999-20 agostu 2020) ne’e, juventude ida hosi juventude atus ba rihun iha Timor-Leste, ne’ebé iha biban ne’ebá foin mak halo tinan 21, Memensio Sequeira Freitas, haktuir ninia memória istória pasada kona-ba Mau-Huno nia istoria ne’e ba jornalista Agência TATOLI, Cancio Ximenes, liuhosi WhatsApp (WA), tersa (25 agostu 2020).

Moris iha Ai-Tarak Nia Leet

Memensio Sequeira Freitas.

Iha 1999, ha’u nia otas iha ona tinan 21. Iha altura ne’ebá, ha’u hela iha Quintal Boot, iha loos semitériu “Taman Makam Pahlawan” nia kotuk no iha kedas pos batallaun BTT nia sorin (uma tatís kona malu kedas). Ba oin; iha kedas morus rate nian, ba kotuk; uma milisia Ai-Tarak nian, ba karuk; pos Ai-Tarak iha kedas dalan ninin no ba liman loos; pos BTT rabat kedas uma. Situasaun difisil la halimar no obriga ha’u, hakarak ka lakohi tanke ransu duni ho bapa (javanese) no membru Ai-Tarak sira atu bele salva moris.

Iha momentu ne’ebá, ha’u-nia pai komu nu’udar estafeta nasionál ida entaun nia ba hela tiha kedas ona iha Uaimori Tula hamutuk ho Prezidente Konsellu Diretiva FRETILIN, señór Francisco Guterres ‘Lú-Olo’ iha nia baraka. Tanba ida-ne’e duni, mak iha dia 20 de agostu 1999, ha’u sei konsege ba asiste komemorasaun loron FALINTIL nian iha Uaimori Tula.

Fila hosi Uaimori iha loron 21 fulan agostu tinan 1999, situasaun iha Quintal Boot komesa manas ona no ema iha uma hotu-hotu kuaze evakua ona ba iha Koléjiu São José Balide Dili. Loron ba loron, ha’u haree ema lalin sasán nadodon ba Balide atu refujia, enkuantu ha’u ho ha’u-nia mama ho alin na’in-haat (4) (ida moras malária krónika no mate iha fín 1999) labele halo buat ida tanba pozisaun uma ne’ebé la posibilita atu ami sai hosi ami-nia uma. Bele dehan, ami simu de’it ona realidade atu hela iha uma mezmu buat aat sei akontese ba ami-nia moris.

Loron haat (4) antes Konsulta Populár, iha loraik ida ha’u sei ba Merkadu Lama atu bele hola buat ruma. Molok atu fila, la espera, ha’u hetan loos membru Milisia Ai-Tarak ida ké nia ema Ossú no koñese ha’u di’ak loos. Ema ne’e naran Manuel no kustuma bolu “Manu-Rusak” (oras ne’e nia sei hela iha Kupang, Indonézia). Sees mós la biban, ha’u tenke se oin duni ba nia. Hetan tiha ha’u, nia para loos iha ha’u-nia oin hodi husu ha’u, “Kamu mau ke mana?”

Ho nakdedar uitoan, ha’u hatán ho dalen Makasa’e katak “Ani mini-gali Quintal Boot isi-la’a nana” (ha’u atu bá fali Quintal Boot). Nia husu tenik, “Kamu tinggal di mana?” Ha’u sei ta’uk hodi hatan nafatin ho dalen Makasa’e katak “Ani pos Ai-tarak gi-ge’e Quintal Boot isi-ere mali wee di’ara” (ha’u hela besik loos iha pos Ai-Tarak nian iha Quintal Boot). Nune’e nia kaer ha’u nia liman hodi dehan, “Tenang, saya akan antar kamu pulang”.

Ho ta’uk nafatin, ha’u hodi biit la’o tuir nia sai hosi merkadu laran, la’o nonook loos iha nia sorin. To’o iha Kabupaten Dili nia kantor oin, nia hatudu ona ba pasta kiik ne’ebé nia kesi hela iha nia knotak hodi husu ha’u, “Kamu tahu ini apa?” Ha’u doko ulun de’it, sinál katak ha’u lahatene. Nia hasai tiha pistola rakitan ida no nia dehan, “Kamu tenang saja, jalan dengan Manu-Rusak itu aman”!

Nia sei hatutan tan “mak ema ruma ameasa ó karik temi de’it Manu-Rusak ne’e sira hatene”. Ha’u-nia laran kmaan uitoan no la’o nonook iha nia sorin, to’o ha’u to’o no hela iha ha’u nia uma no nia bá liu pos Ai-Tarak iha rate Santa-Krúz oin (besik kedas matebian Aquita Tama-laka nia uma sorin).

Lorloron ha’u (komu la iha opsaun seluk ona), asiste hamutuk ho membru Ai-Tarak sira ema nadodon sa’e bá Dare no bá Seminariu Balide. Komu hela loos iha pos BTT no Ai-Tarak nian, ami labele sai hosi uma no dala ruma hetan daudaun ameasa hosi membru Ai-Tarak ida iha uma kotuk atu hili Autonomia no karik mosu buat ruma tenke tuir sira refujia ba Kupang-Timor Osidental-Indonézia. Aleinde tanba hela iha pos rua ne’e nia klaran, iha momentu ne’ebá mós tanba ha’u-nia alin (Matebian Roque Amaral) moras todan hela entaun ami labele halo buat ida.

Iha loron 30 fulan Agostu 1999, tuku 08.00 de’it ha’u ho ha’u-nia mãe ba forma tiha ona iha eskola Balide (atuál Escola Portuguesa Dili atu tuir Konsulta Populár. Fó tiha ami-nia votu iha Konsulta Populár ne’e, ami fila hikas ba uma no hela nonook iha uma laran, mezmu situasaun aumenta manas ba beibeik. Kuaze loroloron rona ema tiru, inklui tiru hosi pos rua ne’e. Quintal Boot mamuk ona. Ema hotu-hotu refujia ona no maluk balun be hetan ami nafatin iha uma hakilar atu ami sai maibé situasaun la permite atu sai. Enkuantu ema hosi fatin-fatin nadodon maka’as liu tan iha Paiol leten hodi bá Dare.

Iha loron 4 fulan Setembru 1999 dadeer, ha’u sei asiste anunsiu rezultadu Konsulta Populár iha pos BTT nian. Anunsiu dahuluk, indika “Otonomi” mak manan. Ho tanis, ha’u toba de’it iha uma laran. Liu de’it minutu balu, anunsia fali indika katak Independénsia mak manan. Ha’u kontente tebe-tebs mezmu haksoit de’it iha uma laran. Kilat komesa tarutu maka’as no BTT ho Ai-Tarak sira hanesan loos nehek tata sira ain be deskontroladu hodi tiru arbiru. Ami-nia sasan haloot hotu ona, maibé, lahatene atu halai oinsá.

Iha tuku 10.00 dadeer, ha’u tidin tiha bandeira Mera-Putih iha uma oin, atrai bapa ho mílisia sira atu labele hanoin aat ba ami. Membru Ai-Tarak ida iha uma kotuk (ema Liquiça, naran Joaquim), haruka nia feen mai ko’alia ho ha’u-nia mama atu prepara sasán ba Kupang. Ami pasiénsia tenke tuir de’it para bele moris. Iha tuku 11.30 (maizoumenus), membru Ai-Tarak ida ho naran António (ema Uatolari ke koñese mós ha’u tanba lorloron hasee hela malu) halai ho iis boot mai iha uma hodi hakilar, “Be ó ne’e hakarak mate ka hakarak moris mak tuur bilán fali iha uma? Nusa la lori ferik ho labarik sira halai ba seminariu Balide ona? Ó mane klosan boot ida mak hanoin laiha ne’e.  Ó hakarak ema oho tiha ó mak ó halai ka?”

Rona ida-ne’e, ha’u hakilar tutan ba ferik atu ami halai ba seminariu Balide tanba momentu ne’ebá pos BTT mamuk tanba sira hotu ba iha semitériu oin hodi tiru. Ha’u ko’us ha’u-nia alin ida moras ne’e, enkuantu ferik lori ami-nia sasán uitoan hodi dada alin sira seluk nia liman, hodi ami konsege halai bá seminariu Balide. Ami ba hetan loos fatin iha sala Koléjiu São José nian. Ferik konsege fila ba uma no lalin mós ami-nia sasán balun sein hetan difikuldade boot. Loron ne’e, ami mak sai ikus liu ona hosi Quintal Boot, no grasas a Deus, la hetan buat aat ida.

Iha lorokraik (maizumenus tuku 17.00), ha’u hamriik uitaan iha janela hodi hateke tuun ba Quintal-Boot. Hamriik la kle’ur, ha’u toba fali iha kulixaun leten iha alin ida moras ne’e nia sorin. La liu minutu rua, rona kilat tarutu iha uma laran no bala musan ida kona loos iha jenela ida ohin ha’u hamriik ba ne’e, hodi borus mai parede (iha kedas kuadru leten besik kruz fiksu iha parede aula nian). Ha’u-nia klamar semo lakon. Se ha’u mak hamriik kleur utioan karik, ha’u kala mate duni, ema kala atirra duni ba ha’u. Ha’u-nia sorte mak liu…

Aguenta iha koléjiu to’o loron 05 fulan setembru 1999, situasaun la kondusivu no rona iha kalan ne’e katak BTT ho Ai-Tarak Quintal Boot atu sa’e mai koléjiu atu halo operasaun ba ema hotu ne’ebé sai hosi Quintal Boot. Iha dia loron 06 setembru dadeersaan de’it, ha’u deside sai hosi semináriu Balide hodi husik mesak ferik ho alin sira. Bainhira la’o besik Dare, ha’u hetan komandante Mau-Huno hamutuk ho saudozu Apeu Kuluhun (Apeu Ikan Fafuluk), maun Eladio Faculto (eiz deputadu FRETILIN) no sira seluk tan. Komu ha’u hetan maun Eladio no maun Apeu ho katuas Mau-Huno, entaun ha’u deside atu la’o ho sira no tanba maun Eladio ho maun Apeu bolu netik duni ha’u. Ami hela oras balun nia laran iha Dare nia okos mai, loraik mak ami sa’e hamutuk bá Dare hodi ba hela iha maun Ambere Dare nia uma. Hosi laletek Dare, ha’u haree hetan momoos ahi su’ar iha Sidade Dili nia laran su’ar sa’e ba lalehan no kilat kontinua tarutu iha fatin-fatin.

Iha loron 07 setembru (1999) dadeersaan de’it, ho orientasaun hosi katuas Mau-Huno, ami sai hosi Dare atu halo viajen ba Uaimori Tula tanba katuas Mau-Huno iha ideia ruma atu ko’alia ho Komandu Luta nian. Iha ekipa ne’e mak kompostu hosi katuas Mau-Huno, maun matebian Apeu, maun Eladio, ha’u rasik, maun Ambere Dare, katuas Lorenço Nahaek no joven na’in rua tan. Hosi Dare ami la’o mai Nahaek no la’o ba Uaimori liu hosi dalan ba Kotolau nian.

Maisumenus tuku 14.00 lorokraik, ami deskansa uitoan iha Kotolau nia okos mai, katuas Huno loke hela rádiu Olanda hodi rona notísia. Notísia fó sai kona-ba saudozu Mau-Hudo Raan Kadalak nia viajen ba Kupang hamutuk ho refujiadu timoroan bara-barak. Rona tiha notísia ne’e, katuas Mau-Huno monu dezmaia kedas iha fatin no la’o la di’ak (iha altura ne’bá kedas komandante Mau-Huno komesa moras to’o de’it agora). Maun Peu Kulu-Hun hodi biit kateu de’it katuas iha nia kotuk hodi hatoba tiha katuas iha ai-mahon ida nia okos.

Saudozu Mau-Hudo Raan Kadalak (klaran) tuur hamutuk ho Lider Pro-Autonomia, João Tavares, no Fracisco Lopes da Cruz. Imajen/Espesiál.

Bainhira katuas hadeer hikas mai, nia tanis hodi dehan “Hodu, ha’u hateten fila-fila ba ó atu ita rua sai ona hosi Dili. Maibé ó la rona, desta vez, ó kala sai duni vítima ba komandu nia orientasaun”. Ami desidi la kontinua viajen. Kalan ne’e, ami toba tiha de’it iha Kotolau (iha katuas Lourenço nia família ida-nia uma). Loron 08 setembru 1999 dadeer, ami deside fila mai Nahaek iha katuas Lourenço nia to’os laran. Ami hela iha ne’ebá to’o International Force for East Timor (INTERFET) tama iha Dili. Loroloron, ami han ai-farina, ai-dila, koto moruk no selu-seluk tan hosi tiu Lourenço nia to’os laran. Ami fahe malu loron tolu (3) depoizde INTERFET kontrolu ona Dili laran.

Tuun hosi Nahaek, ha’u ba buka ha’u nia ferik ho alin sira iha koléjiu. Ha’u la hetan sira. Ha’u hanoin milísia sira lulun hotu ona sira ba Kupang-Indonézia. Afinál lae! Tanba ha’u-nia alin ida moras ne’e grave liu ona, entaun ambulansia HOPE nian tula tiha ona ba ospitál boot iha Bidau. Ha’u konsege hetan sira iha ne’ebá no hein ha’u-nia alin iha de’it ospitál durante fulan rua nia laran.

Ne’e mak ha’u-nia memória kona-ba Konsulta Populár 1999. Durante INTERFET halo operasaun iha Dili laran, ha’u sei asiste mós oinsá INTERFET kontrola sidade tomak ho sira-nia ekipamentu funu nian. Ha’u asiste mós loron ikus liu Tentara Nasional Indonesia (TNI) balu husik hela Timor-Leste ho sira-nia roo-ahi militár nian. Ha’u mós asiste INTERFET kaer eis milísia balu, sidadaun sira sunu eis KODIM Dili no refujiadu timoroan sira balu to’o hikas fali hosi Kupang mai Dili.

Memória hirak ne’e, sei fresku loos iha ha’u-nia ulun. Ha’u agradese no orgullu, tanba, ha’u iha mós oportunidade atu fó ha’u-nia “VOTU IDA” ba “TIMOR-LESTE IDA” nia “INDEPENDÉNSIA IDA”.

Jornalista: Cancio Ximenes

Editór: Agapito dos Santos  

HAKEREK NO HATÁN

Please enter your comment!
Please enter your name here